އޭސީސީން ކުރާ ތަހުގީގުތައް އަވަސްކުރުމަށް ޕީޖީ އަމުރު ކުރައްވައިފި

އެންޓިކޮރަޕްޝަން ކޮމިޝަނުން ކުރާ ތަހުގީގުތައް އަވަސްކުރުމަށް ޕްރޮސިކިއުޓާ ޖެނެރަލް އަމުރު ކުރައްވައިފި އެވެ.

ޕީޖީން ބުނެފައިވަނީ އެންޓިކޮރަޕްޝަން ކޮމިޝަނުން ހިނގައި ޖިނާއީ ތަހުގީގުތައް އެކަށީގެންވާ އަވަސްމިނެއްގައި ހިނގަމުން ނުދާކަމުގެ ޝަކުވާ ޕްރޮސިކިއުޓާ ޖެނެރަލްގެ ސަމާލުކަމަށް އައިސްފައިވާ ކަމަށެވެ.

މިކަންޕްރޮސިކިއުޓަ ޖެނެރަލް އައްބާސް ޝަރޫފު ބެއްލެވިއިރު، ދައުލަތާއި އާންމު ރައްޔިތުންގެ މަސްލަހަތު މަތީ މިންވަރަކަށް ހިމެނޭ މައްސަލަތަކުގެ ތަހުގީގު ހިމެނޭ ގޮތުން، އޭސީސީ އިން ހިންގައި ޖިނާއީ ތަހުގީގުތައް ލަސްވެ، ކޮރަޕްޝަނާއި ހިޔާނާތުގެ މައްސަލަ ތަކުގައި ދައުލަތަށް ގެއްލޭ ފައިސާ އަނބުރާ ހޯދުމުގައްޔާއި އެފަދަ މައްސަލަތަކުގައި ދައުލަތާއި އާންމު ރައްޔިތުންގެ މަސްލަހަތު ތަކަށް އުނިކަން އަންނަމުންދާކަން ސަމާލުކަމަށް އައިސްފައިވާ ކަމަށް ޕީޖީން ބުނެ އެވެ.

މި ސަބަބަށް ޓަކައި، ގާނޫނުއަސާސީގެ 223 ވަނަ މާއްދާގެ (ޅ) އާއި، އެ މާއްދާގެ (ފ) އިން ޕީޖީ އަށް ލިބިދޭ ބާރުގެ ދަށުން، އޭސީސީން ތަހުގީގު ކުރަމުން އަންނަ އެންމެހައި ޖިނާއީ މައްސަލަތައް ޕީޖީ އޮފީހަށް ހުށަހެޅުމުގައި އަމަލު ކުރާނެ ގޮތުގެ އިރުޝާދެއް އެކުލަވައިލައި، އެ އިރުޝާދަށް މިއަދުން ފެށިގެން އަމަލު ކުރުމަށް އަމުރު ކުރައްވާފައިވެ އެވެ.

ޕީޖީގެ އަމުރުގައި އެމްއެމްޕީއާރުސީ މައްސަލައާއި، ކޮވިޑް-19 އާ ގުޅިގެން ދައުލަތުގެ މުދަލާއި ފައިސާ ނަހަމަ ގޮތުގައި ބޭނުން ކުރުމުގެ މައްސަލަ އާއި، ސަރުކާރު ހިއްސާވާ ކުންފުނި ތަކާއި، ބިންވެރިޔާ އަދި ގެދޮރުވެރިޔާ ސްކީމްއާ ގުޅުންހުރި މައްސަލަތައް ފަދަ ދައުލަތުގެ މާލިއްޔަތާއި އާންމު ފަރުދުންގެ މަސްލަހަތާ ގުޅުން ހުރި ހިޔާނާތުގެ ބޮޑެތި މައްސަލަ ތަކުގެ ތަހުގީގު، ހާއްސަ ސަމާލުކަމެއް ދީގެން އަވަސްކޮށް، ޕީޖީ ދެއްވާފައިވާ އިރުޝާދާ އެއްގޮތަށް އެ އޮފީހަށް ހުށަހެޅުމަށްވެސް އަމުރު ކުރައްވާފައިވެ އެވެ.