ހުޅުމާލޭގައި މިރޭ ހަވާ އަރުވާނެ

ހުޅުމާލޭގައި މިރޭ ހަވާ އަރުވަން ހަމަޖެހިފައިވާ ކަމަށް އެމްއެންޑީއެފުން ބުނެފިއެވެ.

ހަވާ އެރުވުމަށް ހަމަޖެހިފައި ވަނީ އެ ތަނުން ބުނިގޮތުގައި މިރޭ 9:30ގައި ހުޅުމާލޭ ދެވަނަ ފޭސްގެ ވިނަރެސް ފްލެޓް ދިމާ ބޭރުންނެވެ.

ހަވާ އެރުވުން ކުރިއަށް ދާނީ ގާތްގަނޑަކަށް ފަސް މިނެޓެއްހާ އިރަށެވެ.

އެމްއެންޑީއެފް އިން ބުނީ ވިޔަފާރި އުސޫލުން ހުޅުމާލޭގައި މިރޭ ހަވާ އަރުވަނީ އަމިއްލަ ފަރާތަކުން ބާއްވާ ހަފްލާއެއް ފާހަގަ ކުރުމުގެ ގޮތުން އެ ފަރާތުން އެދިގެން ކަމަށެވެ.

ހަވާ އެރުވުމުގެ ކަންކަން ކުރިއަށް ގެންދަނީ އެމްއެންޑީއެފްގެ ސިފްކޯގެ ފަރާތުންނެވެ.

ސިފްކޯ އިން އަންނަނީ ސަރުކާރާއި އަމިއްލަ ފަރާތްތަކުން ބާއްވައި އެކިއެކި ހަފްލާތަކަށް ހަވާ އެރުވުމުގެ ކަންކަން ވިޔަފާރި އުސޫލުން ކޮށްދެމުންނެވެ.

އެކި މުނާސަބަތުތަކާ ގުޅުވައިގެން މާލެއާއި ހުޅުމާލޭގައި ހަވާ އެރުވުމަކީ މި ފަހަކަށް އައިސް ކުރާ ކަމެކެވެ.