ކުޑަދޮރުން ކުއްޖަކު ނުކުންނަ މަންޒަރު ފެންނަ ވީޑިއޯ ދައުރު ނުކުރަން އެދެފި

އިމާރާތެއްގެ ފަސް ވަނަ ފަންގިފިލާގެ ކުޑަދޮރަކުން ކުޑަ ކުއްޖަކު ބޭރަށް ނުކުތުމަށް މަސައްކަތް ކުރާ މަންޒަރު ފެންނަ ވީޑިއޯ ދައުރު ނުކުރުމަށް ފުލުހުން އިލްތިމާސް ކޮށްފި އެވެ.

މީސް މީޑިއާގައި ދައުރުވަމުން އަންނަ ވީޑިއޯއިން ފެންނަނީ ކުޑަކުއްޖަކު އުސް އިމާރާތެއްގެ ފަސް ވަނަ ބުރީގެ ކުޑަދޮރުމައްޗަށް އަރައި ދެފައި ތިރިކޮށް ބޭރަށް ފައިބަން އުޅޭ މަންޒަރެވެ. އެގޮތަށް ދެ ފަހަރެއްގެ މަތީން އެ ކުއްޖާގެ ދެފައި ތިރިކޮށްލަ އެވެ.

އަދި އެ ވަގުތު މަގުމަތީގައި ތިބި ބަޔަކަށް އެ މަންޒަރު ފެނިގެން އެ ކުއްޖާ އެތެރެއަށް ވަނުމަށް ގޮވައި ނަސޭހަތްތެރިވާ އަޑު ވެސް އެ ވީޑިއޯއިން އިވެއެވެ.

މި ވީޑިއޯ މައްސަލަ ސަމާލު ކަމަށް އައުމާއެކު މި ހާދިސާއާ ގުޅިގެން އަޅާންޖެހޭ ފިޔަވަޅުތައް އަޅަމުން އަންނަ ކަމަށް ފުލުހުން ކުރި އެކްސް ޕޯސްޓުގައި ބުނެފައިވެ އެވެ.

"އިމާރާތެއްގެ 5 ވަނަ ފަންގިފިލާގެ ކުޑަދޮރަކުން ކުޑަ ކުއްޖަކު ނުކުތުމަށް މަސައްކަތްކުރާ މަންޒަރު ފެންނަ ވީޑިއޯއެއް ފުލުހުންގެ ސަމާލުކަމަށް ވަނީ އައިސްފަ. މި ވީޑިއޯ ދައުރު ކުރުން ހުއްޓާލައި ވީޑިއޯ ރިމޫވްކޮށްލަން އަޅުގަނޑުމެން އެންމެހާ ފަރާތްތަކަށް އިލްތިމާސްކުރަން،" ޕޯސްޓުގައިވެ އެވެ.

ފުލުހުން ބުނި ގޮތުގައި މިފަދަ ވީޑިއޯތައް ދައުރު ކުރުމަކީ އެ ކުއްޖާއާއި ކުއްޖާގެ އާއިލާ، އާންމުންގެ ފާޑުކިޔުމާއި ނަފްސާނީ ގޮތުން އަނިޔާއަށް ހުށަހެޅިގެން ދާނޭ ކަމެއް ކަމަށާއި އަދި އާއިލާގެ އިތުރުން، މިކަމުގެ ސަބަބުން މި ވީޑިއޯ ފެންނަ ކޮންމެ މީހަކަށް ވެސް ނަފްސާނީ ގޮތުން އަސަރު ކުރުމަކީ އެކަށީގެންވާ ކަމެކެވެ.

މީގެ އިތުރުން، މިފަދަ މަންޒަރުތަކުގެ ސަބަބުން، ކުޑަކުދިން ނުވަތަ ވަލްނެރަބްލް މީހުން، "ޓްރިގާ" ވެ، އެ މީހުން ނުރައްކަލަކަށް ހުށަހެޅިދާނެ ކަމަށް ފުލުހުން ދެކޭ ކަމަށް ބުނެ އެވެ.

އެފަދަ ފޫޓޭޖުތައް ދައުރު ކުރުމަކީ، ސޯޝަލް މީޑިއާގައި ސަމާލުކަން ހޯދުމަށް މަސައްކަތް ކުރާ ސަގާފަތެއްގެ ގޮތުގައި އާލާވެ، ސަލާމަތާއި ރައްކާތެރިކަމާ ގުޅޭ މުހިންމު ކަންކަމަށް ދެވޭ ސަމާލުކަން ކުޑަވަގެން ހިނގައިދާނެ ކަމެއް ކަމަށް ފުލުހުން ބުންޏެވެ.

"މީގެ ބަދަލުގައި ރައްކާތެރި ކަމުގެ ފިޔަވަޅު ތަކަށް އަހައްމިއްޔަތުކަން ދީ، ކުޑަދޮރުތަކާއި ބެލްކަނިތައް ރައްކާތެރި ކުރުމާއި، ކުޑަކުދިންނަށް ނުރައްކާތަކާ ބެހޭގޮތުން ހޭލުންތެރި ކުރުމާއި، އަދި މިފަދަ ވީޑިއޯތައް އިތުރަށް ދައުރު ކުރުމުގެ ބަދަލުގައި އެ ޕްލެޓްފޯމް ތަކުން ނެގުމަށް ރިޕޯޓު ކުރުން ފަދަ ކަން ކަމަށް އިސްކަންދިނުމަށް މި ހިދުމަތުން ގޮވާލަމެވެ،" އެކްސް ޕޯސްޓުގައިވެ އެވެ.

އެއްވެސް ފަރާތަކުން މި ވީޑިއޯ ޝެއާ ކޮށްފައިވާ ނަމަ އެ ނަގާ، އެހެން މީހުންނަށް ވެސް އެކަން ނުކުރުމަށް ބާރުއެޅުމަށް ވެސް ފުލުހުން އިލްތިމާސް ކުރެ އެވެ.