ބިދޭސީން ހަމަނުޖެހުން ހިންގައި ތަންތަން މޮނީޓާ ކުރަން ސިލްސިލާ އޮޕަރޭޝަނެއް

އާންމު ސަރަހައްދު ތަކަށް އެއްވެ އުޅޭ ބިދޭސީންގެ މެދުގައި މިފަހަކަށް އައިސް އާއްމު މަސްލަހަތު ގެއްލޭ ފަދަ ކަންކަން ހިންގަމުންދާ ކަން ފާހަގަ ކުރެވިފައި ވާތީ އެ ތަންތަން މޮނިޓާ ކުރަމުން އަންނަ ކަމަށް މޯލްޑިވްސް އިމިގްރޭޝަނުން މިއަދު ބުނެފި އެވެ.

އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން ވަނީ ބިދޭސީން ހަމަނުޖެހުން ހިންގައި ސަރަހައްދުތައް މޮނިޓާ ކުރަން ފަށާފައި ކަމަށް އެ އިދާރާއިން ކުރި އެކްސް ޕޯސްޓެއްގައި ބުނެފައިވެ އެވެ.

އަދި އާއްމު މަސްލަހަތައް ނުރައްކާ ވެދާނެ މި ފަދަ އަމަލުތައް ތަކުރާރުވިޔަ ނުދިނުމަށް ޓަކައި އެ އިމިގްރޭޝަންގެ ފަރާތުން މި ހަރަކާތް ސިލްސިލާކޮށް ކުރިއަށް ގެންދިއުމަށް ނިންމާފައިވާ ކަމަށް ވެސް ބުންޏެވެ.

"މި ހަރަކާތްތައް ކުރިއަށްދާއިރު ގަވާއިދާ ހިލާފަށް އުޅޭ ބިދޭސީންގެ މައްސަލައެއް ފާހަގަ ވެއްޖެ ނަމަ ޓާސްކު ފޯހުން އެ ފަދަ ބިދޭސީންނާ މެދު ފިޔަވަޅު އަޅާނެ،" ޕޯސްޓުގައިވެ އެވެ.

ރާއްޖޭގައި ގާނޫނާއި ގަވައިދާ ހިލާފަށް އުޅޭ ބިދޭސީންނާއި ކުށުގެ ވެށީގައި އުޅޭ ބިދޭސީން ހޯދުމަށް އިމިގްރޭޝަނުން ކުރިއަށް ގެންދާ ސިލްސިލާ އިންސްޕެކްޝަން ތަކުގައި ގިނަ އަދަދެއްގެ ބިދޭސީން އެ ތަނުގެ ބެލުމުގެ ދަށަށް ގެންގޮސް އަހަރުގެ މިހާތަނަށް 5،000 އަށްވުރެ ގިނަ ބިދޭސީން އަނބުރާ ގައުމަށް ފޮނުވާލާފައިވެ އެވެ.

މި ރާއްޖޭގެ ކުށުގެ ވެއްޓަށް ބަލާއިރު ބޮޑެތި ޖިނާއީ ކުއްތަކުގެ ތެރެއިން މަރުގެ މައްސަލަ ތަކާއި މަސްތުވާ ތަކެތީގެ ބޮޑެތި މައްސަލަތައް އަދި ބަދުއަހުލާގީ މައްސައްލަ ތަކުގައި ބިދޭސީން ޝާމިލުވާ މިންވަރު ހުރީ ކަންބޮޑުވާން ޖެހޭ ދަރަޖައިގަ އެވެ.

އޭގެ އިތުރުން ވައްކަމާއި ފޭރުމާއި މުދަލަށް ގެއްލުން ދިނުމުގެ މައްސަލަތަކުގައި ވެސް ބިދޭސީން ބައިވެރިވާ ނިސްބަތް މި ފަހަކަށް އައިސް ގިނަކަން ފާހަގަ ކުރެވެ އެވެ.