އިދިކޮޅަށް އުނދަގޫ ވަނީ ރައްޔިތުންނާއެކު ރައީސް ހޭދަ ކުރައްވައި ވަގުތުގެ ސަބަބުން

ވާދަވެރީންނަށް އުނދަގޫ ވަނީ ރައީސް ޑރ. މުޙައްމަދު މުއިއްޒު ރަށްރަށަށް ވަޑައިގެން ރައްޔިތުންނާއެކު ވަގުތު ހޭދަ ކުރައްވާތީ ކަމަށް ފިޝަރީޒް މިނިސްޓަރު އަހުމަދު ޝިޔާމް މިރޭ ވިދާޅުވެއްޖެ އެވެ.

ރައީސްގެ ރ. އަތޮޅުގެ ދަތުރުފުޅުވެސް ވެގެން މި ދިޔައީ އަތޮޅުގެ ލޮބުވެތި ރައްޔިތުންނަށް އުފާވެރިކަން ގެނުވި ރައްޔިތުންނަށް މުހިއްމު ޚިދުމަތްތަކެއް ފެށިގެންދިޔަ އަދި އުއްމީދު ތަކެއް ގެނުވި ތާރީހީ ދަތުރުފުޅަކަށް ކަމަށް އެ މަނިކުފާނު ކުރެއްވި އެކްސް ޕޯސްޓެއްގައި ވިދާޅުވި އެވެ.

"ވާދަވެރިންނަށް މިއަދު އެންމެ އުނދަގޫވަނީ ރަައީސް ޑރ. މުއިއްޒު ރާއްޖޭގެ ރައްޔިތުންނާ ގާތަށް ވަޑައިގަންނަވާ ވަޑައިގަތުން. ވަކިން ހާއްސަކޮށް ރަށްރަށުގެ ކަޅުފަހުގައި ރައްޔިތުންނާއެކު ހޭދަކުރައްވާ އަގުހުރިވަގުތުތަކުގެ ސަބަބުން،" މިނިސްޓަރު ވިދާޅުވި އެވެ.

ރ. އަތޮޅުގެ 11 ރަށަކަށް ރައީސް ކުރެއްވި ދަތުރުފުޅުގައި އަތޮޅު ކައުންސިލާއި ރަށު ކައުންސިލް ތަކާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ ތަކާއި، ރަށް ރަށުގެ މުވައްސަސާ ތަކުގެ އިސް ވެރީންނާ ބައްދަލު ކުރައްވައި، އެ ރަށްރަށުގެ ތަރައްގީއަށް ބޭނުންވާ ކަންކަމާއި، ރައްޔިތުން އެންމެ އެދޭ ކަންކަމާ ގުޅޭ ގޮތުން މަޝްވަރާ ކުރައްވާފައިވެ އެވެ.

މިގެ އިތުރުން ރައްޔިތުންގެ ގާތަށް، ރަށްރަށަށް ވަޑައިގެން، ރައްޔިތުންގެ ހާލު ބައްލަވާ، އެ ރައްޔިތުންނަށް އެންމެ ބޭނުން ޖެހިފައިވާ ކަންކަން އޮޅުންފިލުއްވައި، ދިމާވެފައިވާ މައްސަލަ ތަކަށް ހައްލު ހޯއްދެވުމަށް އެކިއެކި މުއައްސަސާ ތަކާއި އެކި ފަންތީގެ ބޭފުޅުންނާ ބައްދަލު ކުރައްވައި މަޝްވަރާ ކުރައްވާފައިވެ އެވެ.