ބަލައި ފާސްކުރި ތަންތަނުގައި މިހާރު ގަވާއިދާ ހިލާފަށް އުޅޭ ބިދޭސީއެއް ނެތް

ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން އިމިގްރޭޝަނުން ހިންގައި އޮޕަރޭޝަންގެ ތެރެއިން މިދިޔަ އަހަރު ބަލައި ފާސްކުރި ތަންތަނުގައި މިހާރު ބިދޭސީން އުޅެމުންދަނީ ސައްހަ ވިސާއަކާއެކު ގަވާއިދާ އެއްގޮތަށްތޯ ބެލުމަށް ހާއްސަ އޮޕަރޭޝަނެއް ފަށައިފި އެވެ.

ޓާސްކުފޯހުން މިދިއަ އަހަރު ބަލައި ފާސްކުރި ތަންތަނުގައި މިހާރު ބިދޭސީން އުޅެމުންދަނީ ސައްހަ ވިސާއަކާއެކު ގަވާއިދާ އެއްގޮތަށްތޯ ބެލުމަށް ވަނީ ހާއްސަ އޮޕަރޭޝަނެއް ފަށާފައިވާ ކަމަށް އިމިގްރޭޝަނުން ކުރި އެކްސް ޕޯސްޓެއްގައި ބުންޏެވެ.

އިމިގްރޭޝަނުން ބުނީ އެގޮތުން އިއްޔެ ބަލައި ފާސްކުރެވުނު ދެ ތަނުގައި ވެސް މިހާރު ގަވާއިދާ ހިލާފަށް އުޅެމުންދާ ބިދޭސީއެއް ނެތްކަން ވަނީ ފާހަގަކުރެވިފައި ކަމަށެވެ.

މި ރާއްޖޭގައި ގަވައިދާ ހިލާފަށް އުޅެމުން ދިޔަ ބިދޭސީންގެ ތެރެއިން 5،000 އެއްހާ ބިދޭސީން މިދިޔަ އެއް އަހަރު ތެރޭ ޑީޕޯޓު ކޮށްފައިވެ އެވެ.

ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް، ރައީސް މުއިއްޒުގެ އިރުޝާދުގެ ދަށުން އަންނަނީ ގިނަ މަސައްކަތްތަކެއް ކުރަމުންނެވެ.

އެގޮތުން ފުލުހުންނާއި އިމިގްރޭޝަން ގުޅިގެން ހިންގައި އޮޕްރޭޝަންތަކުގައި ބިދޭސީން ދިރިއުޅޭ ތަންތަނުގެ އިތުރުން އެ މީހުން މަސައްކަތް ކުރާ ތަންތަން ވެސް އަންނަނީ ބަލައި ފާސް ކުރަމުންނެވެ.

އިމިގްރޭޝަން ބިދޭސީން