އަލިފާނުގެ ހާދިސާއާ ގުޅިގެން 22 މީހަކަށް ވަގުތީ ބޯހިޔާވަހިކަން

މާލޭ މަޖީދީ މަގުގައި ހުރި ގުދަނެއްގައި މިއަދު ފަތިހު އަލިފާން ރޯވުމާ ގުޅިގެން ހަތް މީހަކަށް ވަގުތީ ބޯހިޔާވަހިކަން ހަމަޖައްސައިދީފި އެވެ.

އަލިފާން ރޯވީ ފުރުޓް އެންޑް ޓްރީ އެޕަލް ކިޔާ ފިހާރައަކުން ގުދަނަކަށް ބޭނުން ކުރާ ތަނެއްގަ އެވެ.

އެމްއެންއެންޑީއެފުން ބުނީ މި ހާދިސާގެ މައުލޫމާތު ލިބުނީ 04:20 ހާއިރު ކަމަށާއި އަދި އެ އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރު ކަމަށެވެ.

ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން ބުނީ އެ ހާދިސާގައި ދުމުގެ ސަބަބުންނާއި އިމާރާތަށް ލިބުނު ގެއްލުންތަކުގެ ސަބަބުން ވަގުތީ ބޯހިޔާވަހިކަން ބޭނުންވާ 10 ގޭބީސީއަކުން މުޅިއެކު 33 ފަރާތަކަށް ވަގުތީ ބޯހިޔާވަހިކަން ދީފައިވާ ކަމަށެވެ.

އެންޑީއެމްއޭ އިން ބުނީ މިވަގުތު ފަސް ގޭބިސީއެއްގެ 14 ދިވެހިން އަދި 8 ބިދޭސީންނަށް ވަގުތީ ބޯހިޔާވަހިކަމާއި ކެއިންބުއިން ހަމަޖައްސައިދީފައިވާ ކަމަށެވެ.

އަދި ބިދޭސީ 1 އާއިލާ އިން އަމިއްލަ ވަގުތީ ބޯހިޔާވަހިކަމަށް ބަދަލުވެފައިވާ ކަމަށާއި އަދި 11 ބިދޭސީއަކަށް އެ މީހުން ނިސްބަތްވާ ކުންފުނި ތަކުން އެހީތެރިކަން ފޯރުކޮށްދީފައިވާ ކަމަށް އެންޑީއެމްއޭ ބުނެފައިވެ އެވެ.

މި ހާދިސާގައި އެއްވެސް މީހަކަަށް ގެއްލުމެއް ނުވި ނަމަވެސް އެ ގުދަނާ އިންވެގެން ހުރި ގެއިން މީހުން ހުސްކޮށްފައިވެ އެވެ. އެ ތަނަަށް ވަނީ އަލިފާނުގެ އަސަރު ކޮށްފަ އެވެ.