އުނގޫފާރުގައި ބޯހިޔާވަހިކަމުގެ މަޝްރޫއެއް ފައްޓައިދިނުމަށް ރައީސަށް ދަންނަވައިފި

ރައީސް ޑރ. މުޙައްމަދު މުއިއްޒު، ރ. އުނގޫފާރު ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީއާއި އެރަށުގެ މުއައްސަސާތަކުގެ އިސްވެރިންނާއި ބައްދަލުކުރައްވައި ރައްޔިތުން ބޭނުންވާ ކަންކަމާއި ރައްޔިތުންގެ ކަންބޮޑުވުންތަކާ ގުޅޭގޮތުން މަޝްވަރާކުރައްވައިފި އެވެ.

މި ބައްދަލުކުރެއްވުން ކުރިއަށްދިޔައީ މިއަދު މާޅޮސްމަޑުލު އުތުރުބުރީ އަތޮޅު ކައުންސިލް އިދާރާގަ އެވެ.

މި ބައްދަލުކުރެއްވުމުގައި ކައުންސިލުން ވަނީ މިހާރު އުނގޫފާރުގައި ހިނގަމުންދާ މަޝްރޫއުތައްް ފުރިހަމަކޮށްދެއްވައި، އާ މަޝްރޫއުތައް ފަށްޓަވައިދެއްވުމަށް އެދިފަ އެވެ.

މިގޮތުން ރަށުގައި ބޯހިޔާވަހިކަމުގެ މަޝްރޫއެއް ފައްޓަވައި ދެއްވައި، ރަށު ސުކޫލަށް ދިމާވެފައިވާ ޖާގާއިގެ ދަތިކަން ހައްލުކޮށްދެއްވުމަށާއި، އިތުރު ކުލާސް ރޫމްތަކެއް އެޅުމުގެ މުހިންމުކަން ކައުންސިލުން ފާހަގަކުރި އެވެ.

 މީގެ އިތުރުން ރައީސް ވައުދުފުޅާ އެއްގޮތަށް އާބަން ސެންޓަރެއްގެ ގޮތުގައި ރަށް ތަރައްގީވެގެން އަންނައިރު، ވިޔަފާރި ބަނދަރެއް ރަށުގައި އޮތުމުގެ މުހިންމު ކަންވެސް ކައުންސިލުން ފާހަގަކުރި އެވެ.

އަދި ގައުމީ ޔުނިވަސިޓީގެ ކެންޕަހަކާއި، ޓިވެޓް ސެެންޓެރަކާއި، ސަރުކާރުގެ މުއަަައްސަސާތައް އެއްފުރާޅެެއްގެ ދަށުން ހިދުމަތް ދެވޭނެ އިމާރާތެއްގެ ބޭނުންތެރިކަން ވެސް ކައުންސިލުން ފާހަގަކޮށްފައިވެ އެވެ.

މި ބައްދަލުކުރެއްވުމުގައި ރައީސް ވިދާޅުވީ ކައުންސިލުން ފާހަގަކުރި ކަންކަން ބައްލަވާނެކަމުގަ އެވެ. އަދި އެ މަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަ ކުރި ކަންކަމުގައި ސަރުކާރުން ކުރަމުން ގެންދާ މަސައްކަތްތަކުގެ އެންމެ ފަހުގެ މައުލޫމާތު ހިއްސާ ކުރައްވާފަ އެވެ.