ރަސްގެތީމަށް ބޭނުންވާ ތަރައްގީގެ ކަންކަން މި އަހަރުތެރޭ ކޮށްދޭނަން: ރައީސް

ރައީސް މުއިއްޒު ރ. ރަސްގެތީމުގައި ވާހަކަފުޅު ދައްކަވަނީ -- ފޮޓޯ/ ރައީސް އޮފީސް

ރ. ރަސްގެތީމުގެ ތަރައްގީއަށް ކުރަންހުރި ކަންކަން މި އަހަރު ތެރޭގައި ބާރު ދުވެލީގައި ކޮށްދެއްވާނޭކަމުގެ ޔަޤީންކަން، ރައީސް ޑރ. މުޙައްމަދު މުއިއްޒު އެ ރަށު ރައްޔިތުންނަށް މިއަދު ދެއްވައިފި އެވެ.

ރައީސް މިޔަގީންކަން ދެއްވީ، ރަސްގެތީމު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގަ އެވެ.

އެމަނިކުފާނު ވިދާޅުވީ ރަސްގެތީމުގެ ބަނދަރުގެ މަސައްކަތް މި އަހަރު ތެރޭ ފައްޓަވާނޭ ކަމަށާއި، އަދި ސުކޫލްގެ ކްލާސްރޫމް ތަކާއި ހޯލުގެ މަސައްކަތް މިއަހަރު ތެރޭ ނިންމަވައިދެއްވާނޭ ކަމަށެވެ.

މީގެ އިތުރުން، ކުޅިވަރުގެ މައިދާން ވަސީލަތްތަކާ ގުޅުންހުރި މަސައްކަތް ތަކާއި، ކުނި ނައްތާލުމުގެ މަސައްކަތް ތަކާއި، ސިއްހީ ދާއިރާގައި ހުރި މައްސަލަތައް ހައްލުކޮށްދެއްވުމުގެ މަސައްކަތް ކުރިއަށްއޮތް މަސްތަކުގެ ތެރޭގައި ފައްޓަވާނޭ ކަމަށް އެމަނިކުފާނު ވިދާޅުވި އެވެ.

ރައީސްގެ ވާހަކަފުޅު ނިންމަވާލައްވާފައި ވަނީ، މި އަހަރު ނިމޭއިރު، މައްސަލަތަކަށް ހައްލު ލިބި އެކަމުގެ އުފާ ފާޅު ކުރާ ދަނޑިވަޅުގައި، ރައްޔިތުން އެދޭ ނަމަ، މަސައްކަތް ތަކުގެ ނިމުން ފާހަގަ ކުރުމަށް އެމަނިކުފާނު ރަސްގެތީމަށް އެނބުރި ވަޑައިގަންނަވާނޭ ކަމަށް ވިދާޅުވަމުންނެވެ.

މި ރަސްމިއްޔާތުގައި ވަނީ، ބޭންކް އޮފް މޯލްޑިވްސް އިން ރަށުގައި އޭޓީއެމް ބެހެއްޓުމުގެ މަސައްކަތް ރަސްމީ ގޮތުން ރަށު ކައުންސިލާ ހަވާލު ކުރައްވާފަ އެވެ.

ރައީސް ޑރ މުޙައްމަދު މުޢިއްޒު