އިންޑިއާއިން އައިސް އުޅޭ ފާލު ބަލައި މީހެއްގެ މައްސަލަ ފުލުހުން ބަލަނީ

ފާލު ބަލާ އިންޑިއާ މީހަކު ރާއްޖެ އައިސް ހިދުމަތް ދެމުން އަަންނަ މައްސަލައެއް ސަމާލުކަމަށް އައުމުން، އެ މައްސަލަ ބަލަމުން އަންނަ ކަމަށް ފުލުހުން ބުނެފި އެވެ.

ފުލުހުން މީޑިއާތަކަށް ފޮނުވި މެސެޖުގައި ބުނީ މާސްޓާ ދުރްގާ ރާއޯ ގުރުޖީ" ނަމަކަށް ކިޔާ މީހަކު ރާއްޖޭގައި ރޫހާނީ ފަރުވާގެ ހިދުމަތް ތަކެއް ދޭކަމަށް ބުނެ ސޯޝަލް މީޑިއާގައި އިޝްތިހާރު ކުރަމުންދާ މައްސަލަ ފުލުހުންގެ ސަމާލު ކަމަށް އައިސްފައިވާ ކަމަށެވެ.

އެހެންވެ، މި މައްސަލައާ ގުޅިގެން، ގާނޫނީ ގޮތުން އަޅާން ޖެހޭ ފިޔަވަޅުތައް އެޅުމަށް ޓަކައި ކުރާ ންޖެހޭ މަސައްކަތް ކަމާބެހޭ އިދާރާތަކާ ގުޅިގެން ފުލުހުން ކުރަމުން އަންނަ ކަމަށް ފުލުހުން ބުނެ އެވެ.

ފުލުހުން ބުނީ ދިވެހިންގެ ސަގާފަތާއި ދީނާ ހިލާފު މިފަދަ ކަންކަމުގެ މައުލޫމާތު އެކަކު އަނެއްކަކާ ހިއްސާ ކުރުމުގެ ބަދަލުގައި ވީ އެންމެ އަވަހަކަށް ކަމާބެހޭ އިދާރާތަކުގެ ސަމާލުކަމަށް ގެނެސް ގާނޫނީ ފިޔަވަޅު އެޅުމުގެ މަސައްކަތް ކުރިއަށް ގެންދިއުމަކީ މުހިންމު ކަމެއް ކަމަށެވެ.

އެހެންކަމުން، މިފަދަ އިޝްތިހާރެއް ފެނިއްޖެ ނަމަ ލަސްނުކޮށް އަންގަވައިދިނުމަށް ފުލުހުން އެދިފައިވެ އެވެ.

ދެހާސް ތޭވީސް ވަނަ އަހަރުގެ އޮގަސްޓު މަހުގެ ތެރޭގައި ވެސް ހިންދޫ ފާދިރީއަކު ރާއްޖެ އައިސް، ރޫހާނީ ފަރުވާގެ ހިދުމަތް ދޭ މައްސަލައެއް ތިލަވި އެވެ.

އެ ފަހަރު ފުލުހުން ވަނީ އެކަން ހުއްޓުވައި އޭނާއަށް ރާއްޖެ ނާދެވޭ ގޮތަށް ވަނީ ޑީޕޯޓްކޮށްލާފަ އެވެ.