ރާއްޖެއާ އިންޑިއާ އާ ދެމެދު އޮތް ގުޅުމަށް އައިސްފައިވާ ކުރިއެރުން ދަމަހައްޓަން މަޝްވަރާކޮށްފި

އިންޑިއާގެ އައު ސަފީރާ މިނިސްޓަރު ހަލީލް ބައްދަލުކުރައްވަނީ --

އިންޑިއާއިން ރާއްޖެއަށް ކަނޑައެޅުއްވި އައު ސަފީރު، ޖީ ބަލަސުބްރަމާނިއަމް، ފޮރިން މިނިސްޓަރު ޑރ. އަބްދުﷲ ހަލީލް އާ މިއަދު ބައްދަލު ކުރައްވައިފި އެވެ.

ފޮރިން މިނިސްޓްރީގައި ބޭއްވި މި ބައްދަލުވުމުގައި ދެ ގައުމުގެ ދެމެދުގައި އޮތް ގާތް ގުޅުމަށް މިހާރު އައިސްފައިވާ ކުރިއެރުން ދަމަހައްޓައި އިތުރަށް ބަދަހި ކުރެވިދާނެ ގޮތްތަކާ ގުޅޭ ގޮތުން ދެ ބޭފުޅުން މަޝްވަރާ ކުރެއްވި އެވެ.

މި ބައްދަލުވުމުގައި މިނިސްޓަރު ހަލީލް ވަނީ ދެެ ގައުމުގެ ދެމެދުގައި އޮތް ޒަމާންވީ ރަހުމަތްތެރި ކަން ފާހަގަ ކުރައްވައި، އިންޑިއާ އިން ރާއްޖެއަށް ފޯރުކޮށްދެއްވާފައިވާ އެހީތެރިކަމަށް ޓަކައި ދިވެހި ރައްޔިތުންނާއި ދިވެހި ސަރުކާރުގެ ފަރާތުން ޝުކުރު އަދާ ކުރައްވާފަ އެވެ.

ފޮރިން މިނިސްޓްރީން ބުނި ގޮތުގައި މި ބައްދަލުވުމުގައި ދެ ގައުމަށް ފައިދާ ހުރި ކަންތައްތައް ހާސިލު ކުރުމަށް ޓަކައި ސަރުކާރާއެކު ގާތުން މަސައްކަތް ކުރައްވާނެ ކަމުގެ ޔަގީންކަން އިންޑިއާގެ ސަފީރު ދެއްވާފައިވެ އެވެ.

މިއަދުގެ ބައްދަލުވުމުގައި ހަލީލްގެ އަރިހުގައި ފޮރިން ސެެކްރެޓަރީ ފާތިމަތު އިނާޔާ އާއި އެމްބެސެޑާ އެޓް ލާޖް މުޙައްމަދު ފަހުމީ ހަސަން އާއި އިންޑިއާ ޑިވިޝަންގެ ޖޮއިންޓް ސެކްރެޓަރީ ޑރ. އިބްރާހިމް ޒުހުރީގެ އިތުރުން ޑިރެކްޓާ އަހުމަދު ސުޒިލް އަދި ޑިރެކްޓާ އާއިޝަތު ޝަހުލާ ބައިވެރިވެވަޑައިގެންނެވި އެވެ.

އިންޑިޔާ މިނިސްޓަރ ހަލީލް