އޮޕަރޭޝަން ކުރަނގި: މިއަދު އެކަނިވެސް 1455 ބިދޭސީންގެ މައުލޫމާތު ނަގައިފި

ރާއްޖޭގައި އުޅޭ ބިދޭސީންގެ މައުލޫމާތު އެއްކުރުމަށް މާލެ ސަރަހައްދުގައި މިއަދު ކުރިއަށް ގެންދިޔަ އޮޕަރޭޝަންގައި 1400އަށްވުރެ ގިނަ ބިދޭސީންގެ މައުލޫމާތު އެއްކޮށްފި އެވެ.

ހޯމް މިނިސްޓަރު އަލީ އިހުސާން ވިދާޅުވީ މިދިޔަ ނޮވެމްބަރު މަހުގެ 17ގައި ރައީސް ޑރ. މުހައްމަދު މުއިއްޒު ގައުމާ މުހާތަބު ކުރެއްވި އިރު، މި އޮޕަރޭޝަންގެ ތެރެއިން 10،000 ބިދޭސީންގެ ބަޔޯމެޓްރިކް ޑޭޓާ ނެގުނު ކަމަށް އިއުލާން ކުރައްވާފައިވާ ކަމަށެވެ. އަދި އެ ފަހުން މިދިޔަ ދެ މަސްތެރޭ ވަނީ އިތުރު 15،000 އަށްވުރެ ގިނަ ބިދޭސީންގެ މައުލޫމާތު ނެގިފައިވާ ކަމަށް ވިދާޅުވި އެވެ.

އިހުސާން ވިދާޅުވީ މިއަދު ކުރި މަސައްކަތުން 1455 ބިދޭސީ މަސައްކަތްތެރިންގެ މައުލޫމާތު ނަގާފައިވާ ކަމަށާއި އަދި މުޅި އޮޕަރޭޝަންގައި މިއަދާ ހަމައަށް 25،483 ބިދޭސީންގެ ބައިމެޓްރިޓް ޑޭޓާ ވަނީ ނެގިއްޖެ އެވެ.

އެމަނިކުފާނު ވިދާޅުވިގޮތުގައި ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ތިން އަހަރުގެ ޕްލޭނެއްގެ ދަށުން ކުރަމުން އަންނަ މި މަސައްކަތް 2027 ވަނަ އަހަރުގެ އޭޕްރީލް މަހަށް ކާމިޔާބުކަމާ އެކު ނިންމާލެވޭނެ އެވެ.

މިއަދުގެ އޮޕަރޭޝަން ކުރިއަށް ގެންދިޔައީ ހެނދުނު 8:00 އިން ހަވީރު 6:00އަށެވެ.

މުޅި ދުވަހުގެ މި އޮޕަރޭޝަންގައި މިނިސްޓްރީގެ 75 އޮފިޝަލަކު މާލޭގެ އިތުރުން، ތިލަފުއްޓާއި ގުޅީފަޅުގައި ހަރަކާތްތެރިވި އެވެ.

ހޯމް މިނިސްޓަރު ކުރިން ވިދާޅުވެފައިވަނީ ކުރަނގި އޮޕަރޭޝަނަކީ ރާއްޖޭގައި އެތައް އަހަރުތަކެއް ވެފައިވާ ގަވައިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުމަށް ފެށި މުހިންމު މަސައްކަތެއް ކަމަށެވެ.

އަދި މި މައްސަލަ ނަގަނީ ގައުމީ ސަލާމަތަށް އޮތް ސެކިއުރިޓީ ކޮންސާނެއްގެ ގޮތުގައި ކަން ފާހަގަ ކުރައްވައި އިހުސާން ވިދާޅުވީ މިކަން ހައްލު ކުރަން އުޅެނީ އެގޮތުގެ މަތީން ކަމަށެވެ.