އެސްޓޯނިއާގެ ދަތުރުފުޅަށްފަހު ރައީސް މާލެ ވަޑައިގެންފި

ރައީސުލްޖުމްހޫރިއްރާ ޑރ. މުޙައްމަދު މުއިއްޒު އެސްޓޯނިއާ އަށް ކުރެއްވި ރަސްމީ ދަތުރުފުޅު ނިންމަވާލެއްވުމަށް ފަހު، މިއަދު މާލެ ވަޑައިގެންފި އެވެ.

ރައީސްގެ މި ދަތުރުފުޅުގައި، އެސްޓޯނިއާގެ ރައީސާއި، ރައްޔިތުންގެ މަޖިލީހުގެ ރައީސާއި، ވަޒީރުންނާއި، ޓާރްޓޫގެ މޭޔަރާއި، ތައުލީމީ ދާއިރާގެ މަންދޫބުންނާއި، ފާހަގަ ކޮށްލެވޭ އެހެނިހެން މުއައްސަސާ ތަކުގެ އިސްވެރީންނާ އެކު ވަނީ ބިނާކުރަނިވި މަޝްވަރާ ތަކެއް ކުރައްވާފަ އެވެ.

މި ދަތުރުފުޅުގައި، ރައީސް ވަނީ ތިން އެއްބަސްވުމެއްގައި ވަނީ ސޮއި ކުރައްވާފަ އެވެ.

އޭގެ ތެރޭގައި ދެ ގައުމުގެ ސަރުކާރާ ދެމެދު މައުލޫމާތު ބަދަލު ކުރުމާއި، މޫސުމީ ބަދަލު ތަކާއި، ތިމާވެއްޓާއި، ހަކަތަ އާއި ބެހޭ ދާއިރާ ތަކުން އެއްބާރުލުން ދިނުމާއި ދެ ގައުމުގެ މެދުގައި ޕޮލިޓިކަލް ކޮންސަލްޓޭޝަން ފެށުމާއި އަދި، ރާއްޖޭގެ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އާއި އެސްޓޯނިއާގެ މިނިސްޓްރީ އޮފް ޖަސްޓިސް އެންޑް ޑިޖިޓަލް އެފެއާޒްއާ ދެމެދު ސޮއި ކުރެއްވި އެއްބަސްވުން ހިމެނެ އެވެ.

ރައީސުލްޖުމްހޫރިއްޔާގެ މި ދަތުރުފުޅުގައި، އެސްޓޯނިއާގެ މުހިންމު އަދި ސަގާފީ ގިނަ ތަންތަނަށް ޒިޔާރަތްކުރެއްވި އެވެ.

އޭގެ ތެރޭގައި އީއެސްޓޯނިއާ ބްރީފިންގް ސެންޓަރު، ޕޯކޯ ޕޮޕް އެންޑު ކޮންޓެމްޕޮރަރީ އާޓް މިއުޒިއަމް، ޓާރްޓޫ ޓައުން ހޯލް، ޔުނިވަސިޓީ އޮފް ޓާރްޓޫ، އެސްޓޯނިއާ ބަޔޯބޭންކް، އެސްޓޯނިއަން ނޭޝަނަލް މިއުޒިއަމް (އީއާރުއެމް) އަދި ގްރީނާޖީ ޑޭޓާ ސެންޓާސް (ޖީޑީސީ) އަށް ކުރެއްވި ޒިޔާރަތް ހިމެނެ އެވެ.

މި ތަންތަނަށް އެމަނިކުފާނު ކުރެއްވި ޒިޔާރަތް ތަކުގައި، މުއައްސަސާތަކުގެ މަންދޫބުން ވަނީ އެ އިދާރާ ތަކުގެ މަސައްކަތްތަކާ ބެހޭ ގޮތުން މައުލޫމާތު ހިއްސާ ކުރައްވައި، ދޭދޭ ގުޅުންތައް ބަދަހި ކުރެވޭނެ ގޮތްތަކާ ބެހޭ ގޮތުން މަޝްވަރާ ކުރައްވާފަ އެވެ.