އަންނަ ހޯމަ ދުވަހު ސައުދީން ހަދިޔާކުރި ކަދުރު ބަހަން ފަށަނީ

ސައުދީ އަރަބިއްޔާ އިން ކޮންމެ އަހަރެއްގެ ރޯދަ މަހަށް ފޮނުވާ ކަދުރު މިހާރު ލިބިފައިވާތީ އެ ކަދުރު އަންނަ ހޯމަ ދުވަހު ބަހަން ފަށާނެ ކަމަށް އިސްލާމިކް މިނިސްޓްރީން ބުނެފި އެވެ.

އިސްލާމިކް މިނިސްޓްރީން ބުނީ ކަދުރު ބެހުމަށް ހަަމަޖެހިފައި ވަނީ ހޯމަ ދުވަހުން ފެށިގެން ފެބްރުއަރީ ހަ ވަނަ ދުވަހުގެ ނިޔަލަށް ރަސްމީ ދުވަސް ތަކުގެ ހެނދުނު 9:30 އިން މެންދުރު 1:00 އަށް ކަމަށެވެ.

އެ މިނިސްޓްރީން ބުނި ގޮތުގައި މާލެ، ހުޅުމާލެ، އަދި ވިލިމާލޭ ސަރަހައްދުގައި ކަދުރު ބަހަނީ މިނިސްޓްރީ އޮފް އިސްލާމިކް އެފެއާޒު މެދުވެރިކޮށް އިސްލާމީ މަރުކަޒުގަ އެވެ. އަދި ރަށްރަަށަށް ނުވަތަ ސިޓީ ތަކުގައި ކަދުރު ބަހާނީ، ރަށު ކައުންސިލު ތަކާއި ސިޓީ ކައުންސިލްތައް މެދުވެރިކޮށެވެ.

ކަދުރު ބަހަން ނިިންމާފައި ވަނީ ކޮންމެ 100 ގެއަކަށް 25 ޕެކެޓުގެ މަގުންނެވެ. ސިޓީ ތަކާއި އަތޮޅުގެ ރަށް ތަކުގައި ކަދުރު ބަހާނީ މީހުން ދިރިއުޅޭ ގޭބިސީ ތަކުގެ ތެރެއިން ކަދުރު ބަލައި ހާޒިރުވާ ތަރުތީބުން ކޮންމެ ގޭބިސީ އަކަށް އެއް ޕެކެޓް ކަދުރެވެ.

ގޭބިސީ ތަކަށް ކަދުރު ބަހާނީ އެ ގޭބިސީއެއްގެ ކަރަންޓު މީޓަރު ނަންބަރަށް ބަލައި އަދި ކަދުރު ބަލައި ދާ ފަރާތުގެ އައިޑީ ކާޑަށް ބެލުމަށްފަހު ކަމަށް ވެސް މިނިސްޓްރީން ބުންޏެވެ.

އެހެން އަހަރުތަކާ ހިލާފަށް މި އަހަރު ޖަމުއިއްޔާ ޖަމާއަތް ތަކުގެ ތެރެއިން ރޯދަ މަހުގެ އިފުތާރު ޕްރޮގްރާމަށް ނުވަތަ ރޯދަ ވީއްލުމުގެ އިންތިޒާމު ހަމަޖައްސައިދޭ ޖަމިއްޔާ ޖަމާއަތް ތަކަށް ވެސް ކަދުރު ދޭ ގޮތަށް މިނިސްޓްރީން ހަމަޖައްސާފައިވެ އެވެ.

މިދިޔަ ދެ އަހަރު ވެސް ސައުދީން 50 ޓަނުގެ ކަދުރު ރާއްޖެއަށް ހަދިޔާ ކުރި އެވެ.