ގާޒާއަށް ދޭ ހަމަލާތައް ހުއްޓާލަން ނިންމުމަކީ ހިތަށް ފިނިކަން ލިބުނު ކަމެއް: ރައީސް

ގައްޒާއަށް ދޭ ހަމަލާތައް މެދުކަނޑާލަން ނިންމަން މެދުވެރި ވެދިން ފަރާތް ތަކުން ކުރި މަސައްކަތް ފާހަގަ ކުރައްވައި، ރައީސް ޑރ. މުޙައްމަދު މުއިއްޒު އެ ފަރާތް ތަކުގެ އަގު ވަޒަން ކުރައްވައިފި އެވެ.

 ހަމަލާތައް ހުއްޓާލަން ނިންމުމާއި ގުޅިގެން، އެ މަނިކުފާނުގެ ޝުއޫރު ފާޅު ކުރައްވައި "އެކްސް" ގައި ކުރެއްވި ޕޯސްޓެއްގައި ވަނީ، ހަމަލާތައް ހުއްޓާލުމަކީ ހިތްޕުޅަށް ލިބިވަޑައިގަތް ހަމަޖެހުމެއްގެ ގޮތުގައި ސިފަ ކުރައްވައިފަ   އެވެ.

ހަމަލާތައް ހުއްޓާލުމަށް ނިންމި ނިންމުން ދެމެހެއްޓުމަށާއި، ގެދޮރު ގެއްލިފައިވާ މީހުންނަށް އެމީހުންގެ ވަޒަނަށް އަނބުރާ ދެވޭނެ ފުރުސަތު ފަހިކޮށްދިނުމަށާއި، އިންސާނީ އެހީ އަށް ފުރުސަތު ދިނުމަށް، ބައިނަލްއަގުވާމީ މުޖުތަމައުގެ ކިބައިން އެމަނިކުފާނު އެދިވަޑައިގެންނެވި އެވެ.

ރައީސް ވަނީ، އިސްރާއީލުން ފަލަސްތީނަށް ދިން ހަމަލާ ތަކުގައި އެ ގައުމުގެ ރައްޔިތުންނަށް ލިބުނު ގެއްލުމުގެ ބަދަލުދޭން ޖެހޭނޭ ކަމަށް ވިދާޅުވެފަ އެވެ. އަދި އިސްރާއީލުން ދިން ހަމަލާ ތަކުގައި ސުންނާފަތިވެފައިވާ އިމާރާތް ތަކާއި ބިނާރު، އަލުން އާރާސްތު ކުރުމަށް ބޭނުންވާ އަވަސް އެހީ ފަލަސްތީނަށް ފޯރުކޮށްދިނުމަށް ވެސް އެމަނިކުފާނު ގޮވައިލެއްވި އެވެ.

ފާއިތުވެ ދިޔަ 15 މަސް ދުވަހުގެ ތެރޭގައިރާއްޖެއިން ވަނީ، ބައިނަލްއަގުވާމީ އެކި މަންސަތަކުގައި ފަލަސްތީނުގެ އުޚުއްވަތްތެރި ރައްޔިތުންގެ ހައްގުގައި ގިނަ މަސައްކަތް ތަކެއް ކޮށްފަ އެވެ.

އެގޮތުން، އދ.ގެ ސަލާމަތީ މަޖިލީހުގެ 79 ވަނަ ސެޝަންގައި ތަގުރީރު ކުރައްވަމުން ރައީސުލްޖުމްހޫރިއްޔާ ވަނީ ގައުމަކުން އިންސާނީ ހައްގު ތަކަށް އަރައިގަންނަ ހިނދު، އެކަން ތަހައްމަލު ކޮށްގެން ތިބެގެން ނުވާނެ ކަމަށް ވިދާޅުވެފަ އެވެ.

އަދި އެފަދަ ހާލަތެއްގައި، އެ ގައުމެއްގެ ކުޑަބޮޑު މިނަކީ ނުވަތަ އެ ގައުމެއްގެ މުއްސަނދި ކަމަކީ ބަހަނާ އަކަށް ވެގެން ނުވާނޭ ކަމަށް ވެސް ރައީސުލްޖުމްހޫރިއްޔާ ވިދާޅުވި އެވެ.

ގާނޫނުގެ ވެރިކަން ނެގެހެއްޓުމުގެ މުހިއްމުކަން ފާހަގަކުރައްވައި، ރައީސުލްޖުމްހޫރިއްޔާ ވަނީ އދ.ގެ ފުރިހަމަ މެންބަރުކަން ފަލަސްތީނަށް ދިނުމަށް ގޮވާލައްވައިފައެވެ.

މީގެ އިތުރުން، ފަލަސްތީނުގައި ހިންގަމުން ގެންދިޔަ ގަތުލުއާންމު އާ ދެކޮޅަށް ބައިނަލްއަގުވާމީ ކޯޓު ތަކަށް ހުށަހެޅި ބޮޑެތި މައްސަލަ ތަކުގައި، ފަލަސްތީނުގެ ރައްޔިތުންގެ ހައްގުގައި ވަކާލާތު ކޮށްދިނުމަށް، ރާއްޖެއިން ވަނީ ތަދައްހުލުވެފަ އެވެ.