މުޙައްމާ އަދި ސަރާހަތު ބްރޯޑްކޮމްއަށް އައްޔަން ކުރަން މަޖިލީހުން ރުހުން ދީފި

މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)ގެ ހުސްވެފައިވާ ދެ މަގާމަށް އިހަވަންދޫ ދާއިރާގެ ކުރީގެ މެންބަރު މުޙައްމަދު އަބްދުﷲ (މުހަންމާ) އާއި ބްރޯޑްކޮމްގެ ކުރީގެ މެންބަރު އާމިނަތު ސަރާހަތު އިއްޒަތު އައްޔަން ކުރަން ރައްޔިތުންގެ މަޖިލީހުން މިއަދު ރުހުން ދީފި އެވެ.

ބްރޯޑްކޮމްގެ ކުރީގެ ރައީސް މަރިޔަމް ވަހީދާ އަދި މެންބަރު އަލީ ޔޫސުފްގެ ދައުރު މިދިޔަ ނޮވެމްބަރު މަހު ހަމަވުމުން އެ މަގާމަށް ކުރިމަތިލާން ހުޅުވައިލުމުން ޝަރުތު ހަމަވާ 12 ފަރާތަކުން ކުރިމަތި ލެއްވި އެވެ.

ރައީސް ޑރ. މުޙައްމަދު މުއިއްޒު ވަނީ އެ މަގާމަށް ކުރިމަތިލި ބޭފުޅުންގެ ތެރެއިން އެ މަނިކުފާނު އިސްކަން ދެއްވާ ތަރުތީބު ބަޔާން ކުރައްވައި، އެ ލިސްޓް މަޖިލީހަށް ފޮނުއްވައިފަ އެވެ. ލިސްޓުގެ އެންމެ ކުރީގައި އޮތީ މުޙައްމާ އަދި ރައީސް އޮފީހުގެ ކުރީގެ ތަރުޖަމާނު އިބްރާހިމް މުއާޒު އަލީގެ ނަމެވެ.

ނަމަވެސް މުއާޒް ވަނީ އިންޓަވިއު މަރުހަލާއިން ކަޓައިފައެވެ. އެހެންކަމުން އޭނާގެ ބަދަލުގައި މަޖިލީހުން ރުހުން ލިބުނީ ރައީސް ފޮނުއްވި ލިސްޓުގެ ހަތް ވަނައިގައި އޮތް ސަރާހަތަށެވެ.

ދައުރުން ބޭރުން ބޭއްވި މިއަދުގެ ޖަލްސާގައި ލިސްޓު ތަރުތީބުން ނެގި ވޯޓުގައި އެންމެ ފުރަތަމަ ވޯޓަށް އެހީ ސަރާހަތުގެ ނަމަށެވެ. އޭނާ ބްރޯޑްކޮމަށް އައްޔަން ކުރަން ފާސްކުރީ 68 މެންބަރުންގެ އިއްތިފާގުންނެވެ.

ދެ ވަނައަށް ވޯޓަށް އެހި ޓީވީ ނޫސްވެރިއާ ޝިފްޒާ އަށެވެ. އޭނާ އައްޔަން ކުރަން ފެންނަ ކަމަށް ވޯޓު ދެއްވީ އެންމެ 11 މެންބަރުންނެވެ. އައްޔަން ކުރަން ނުފެންނަ ކަމަށް ސަރުކާރު ހިންގާ ޕީއެންސީގެ 50 މެންބަރުން ވޯޓު ދެއްވި އެވެ.

މުޙަންމާ އައްޔަން ކުރަން ފާސްކޮށްފައި ވަނީ 58 މެންބަރުންގެ ވޯޓުންނެވެ. ދެކޮޅަށް ވޯޓު ދެއްވީ އެންމެ ދެ މެންބަރުންނެވެ.