ހަމަލާތައް ހުއްޓާލަން އިސްރާއީލާއި ހަމާސްއިން އެއްބަސް ވެއްޖެ

އިޒުރޭލުން ފަލަސްތީނުގެ ގައްޒާއަށްް ދެމުން ގެންދާ ހަމަލާތައް ހުއްޓާލާ އަސީރުން ބަދަލު ކުރުމަށް ދެ ފަރާތުން އެއްބަސްވެއްޖެ އެވެ.

ގަތަރުގައި މިފަހުން ކުރިއަށް ގެންދިޔަ މަޝްވަރާތަކަށްފަހު ދެ ފަރާތުން ވެފައިވާ އެއްބަސްވުމުގެ ދަށުން ހަމާސް އިން ރަހީނުކޮށްފައި ތިބި އިޒުރޭލުގެ ޔަހޫދީން އަނބުރާ ހަވާލު ކުރުން، އަދި އިސްރާއީލުން ހައްޔަރުކޮށްގެން ގެންގުޅޭ ފަލަސްތީނުގެ ގައިދީން ދޫކޮށްލުމަށް އެއްބަސްވެފަ އެވެ.

ނަމަވެސް ދެ ފަރާތުން ވެފައިވާ އެއްބަސްވުމުގެ އިތުރު ތަފުސީލް އަދި ހާމައެއް ނުކުރެ އެވެ.

ހަމާސް އިން ވަނީ މި އެއްބަސްވުން ޔަގީން ނުވަނީސް ގާޒާގެ އާންމުން އެއްވެސް ތަނަކަށް ނުދިއުމަށް އަންގައިފަ އެވެ.

ފަލަސްތީނުގެ ހަމާސް ޖަމާއަތުން ދެހާސް ތޭވީސް ވަނަ އަހަރުގެ އޮކްޓޯބަރު ހަތް ވަނަ ދުވަހު އިޒްރޭލަށް ދިން ހަމަލާގައި 1،139 މީހަކު މަރާލާ 200 މީހުން ރަހީނު ކުރި އެވެ.

ގާޒާގެ މުސްލިމުންގެ ނަސްލު ތައްތާލަން ޖައްބާރު ޔަހޫދީ ސިފައިން ދެމުން ގެންދާ ހަމަލާތަކުގައި މިހާތަނަށް 46،707 މުސްލިމުން ޝަހީދުކޮށްލާފައިވާއިރު 110،265 މީހުން ޒަހަމްވެފައިވެ އެވެ.

އިސްރާއީލާއި ހަމާސްގެ ހަމަލާ ބަދަލުކުރުން ހުއްޓާލުމަށް އެއްބަސްވުމުން ޕަލަސްތީނުގެ ގިނަ އަދަދެއްގެ ރައްޔިތުން އަންނަނީ މަގުތަކަށް ނުކުމެ އުފާ ފައުޅު ކުރަމުންނެވެ.