މީހެއްގެ ގައިގައި ސައިކަލުން ޖައްސައި ފިލި މީހަކު ހައްޔަރު ކޮށްފި

ހުޅުމާލޭގައި އުމުރުން ދުވަސްވީ މީހެއްގެ ގައިގައި ސައިކަލުން ޖައްސައި ފިލި މީހަކު ހައްޔަރުކޮށްފި އެވެ.

އިއްޔެގެ ވަގުތެއްގައި މި އެކްސިޑެންޓް ހިނގާފައި ވަނީ ހުޅުމާލޭ ނިރޮޅު މަގުގައި ހުންނަ ކެއާ ޕްލަސް ފިހާރަ ކައިރީގައި ކަމަށް ފުލުހުން ބުނެ އެވެ.

ފުލުހުން ބުނީ މި އެކްސިޑެންޓުގައި، މަގުން ހިނގާފައި ދިޔަ އުމުރުން 63 އަހަރުގެ ދިވެހި ފިރިހެނެއްގެ ގައިގައި ސައިކަލުން ޖެހި އަނިޔާ ވެގެން ހޮސްޕިޓަލުން ފަރުވާ ދިނުމަށްފަހު އެ މީހާ މިހާރު ދޫކޮށްލާފައިވާ ކަމަށެވެ.

އަދި ސައިކަލު ދުއްވަން އިން މީހާ މި އެކްސިޑެންޓު ހިނގުމާއެކު ސައިކަލު ދޫކޮށްލުމަށްފަހު ފިލުމުން އެމީހާ ހޯދައި އިއްޔެގެ ވަގުތެއްގައި ހައްޔަރުކޮށްފައިވާ ކަމަށް ވެސް ފުލުހުން ބުންޏެވެ.

މި މައްސަލައާ ގުޅުވައިގެން ހައްޔަރު ކޮށްފައި ވަނީ ގދ. ވާދޫ، ފުރުސަތު، ލޫތު އިބްރާހީމް، 27، އެވެ.

އޭނާގެ ބަންދަށް ހަތް ދުވަހުގެ މުއްދަތު ކޯޓުން ދީފައިވާއިރު، ފުލުހުން އަންނަނީ އެ މައްސަލަ ތަހުގީގު ކުރަމުންނެވެ.

މަގު ތަކަށް ނުތަކާ ވަރަށް އެއްގަމު އުޅަނދުތައް ގިނަވެފައިވާ މި މާލެ ސިޓީއަށް ކޮންމެ ދުވަހަކީ ވެސް ބޮޑު އަނިޔާއެއް ވެގެން ހޮސްޕިޓަލަށް ނުގެންދިޔައެއް ކަމަކު ދުއްވާ އެއްޗަކުން ޖެހި ކޮންމެ ވެސް މީހަކަށް އަނިޔާއެއް ލިބޭ ދުވަހެކެވެ.

ނުރައްކާތެރި މި މައްސަލަ ހައްލު ކުރުމަށް ސަރުކާރު ތަކުން މިހާތަނަށް ވެސް ނުކުޅެދިފައިވާ ކަން ފާހަގަކޮށްލެވެ އެވެ.