ސޯޝަލް މީޑިއާގެ އެއްވެސް ޕްލެޓްފޯމެއް ބްލޮކް ކުރަން ނިންމާފައިނުވޭ: ސަރުކާރު

ސަރުކާރުގެ ތަރުޖަމާނު ހީނާ ވަލީދު -- ފޮޓޯ/ ރައީސް އޮފީސް

ސޯޝަލް މީޑިޔާގެ ބައެއް ޕްލެޓުފޯމުތައް ބްލޮކުކުރުމަށް ސަރުކާރުން ވިސްނަމުންދާކަމަށް ބުނެ ފަތުރަމުންދާ ވާހަކަތައް ސަރުކާރުން ދޮގުކޮށްފި އެވެ.

ރައީސް އޮފީހުގެ ތަރުޖަމާނު ހީނާ ވަލީދު ޓްވިޓާގައި މިއަދު ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާގެ ވިސްނުންފުޅަކީ ރައްޔިތުންނަށް ގާނޫނު އަސާސީން ލިބިދީފައިވާ އަސާސީ ހައްގު ތަކާއި މިނިވަންކަން ގާނޫނު އަސާސީގެ އިން ތަކާއި ހުދޫދުގެ ތެރޭގައި އެންމެ ފުޅާ ދާއިރާއެއްގައި ކުރިއަރުވައި ފޯރުކޮށްދިން ކަމަށެވެ.

"ސޯޝަލް މީޑިޔާގެ ބައެއް ޕްލެޓްފޯމްތައް ބްލޮކްކުރުމަށް ސަރުކާރުން ވިސްނަމުންދާ ކަމަށް ބުނެ ފަތުރަމުންދާ ވާހަކަތަކަކީ ކަނޑައެޅިގެން ދޮގު ވާހަކަތަކެއް ކަމުގައި ދަންނަވަމެވެ. ސޯޝަލް މީޑިއާގެ އެއްވެސް ޕްލެޓްފޯމެއް ބްލޮކްކުރުމަށް ސަރުކާރުން ނިންމައިފައިނުވެއެވެ. އަދި އެފަދަ ފިޔަވަޅެއް އެޅުމަށް ސަރުކާރުން މަޝްވަރާކޮށްފައި ވެސް ނުވެއެވެ،" ހީނާ ވިދާޅުވިއެވެ.

ސޯޝަލް މީޑިއާގެ ބައެއް ޕްލެޓްފޯމްތައް ބަންދު ކުރުމަށް އަންނަ މަހުގެ ހަވަނަ ދުވަހު ފަށާ ރައްޔިތުންގެ މަޖިލީހުގެ ފުރަތަމަ ޖަލްސާއަށް ހުށަހަޅަން ނިންމާފައިވާ ކަމަށް ބުނެ އަޑުތަކެއް އަންނަނީ ފެތުރެމުންނެވެ. މީގެ ތެރޭގައި ސްނެޕްޗެޓް އަދި ޓިކްޓޮކް ފަދަ ވަސީލަތްތައް ބްލޮކު ކުރަން މި ސަރުކާރުން ނިންމާފައިވާ ކަމަށް އިދިކޮޅު ބައެއް ފަރާތްތަކުން މީސްމީޑިއާގައި އަންނަނީ ބުނަމުންނެވެ.

ރައީސް އޮފީސް