ސައްހަ ނޫން ފޯމު ހުށަހެޅި މައްސަލައިގައި އިހުސާނާ ސުވާލު ކުރަނީ

ވެރިކަން ކުރާ ޕީއެންސީއަށް މެމްބަރުން އިތުރު ކުރަން ހިންގި ހަރަކާތުގެ ތެރެއިން ސައްހަނޫން ފޯމްތަކެއް އިލެކްޝަންސް ކޮމިޝަނަށް ހުށަހެޅި މައްސަލައާ ގުޅިގެން ހޯމް މިނިސްޓަރު އަލީ އިހްސާނާ ސުވާލުކުރެއްވުމަށް ގަލޮޅު ދެކުނު ދާއިރާގެ މެމްބަރު މީކާއީލް އަހްމަދު ނަސީމް ރައްޔިތުންގެ މަޖިލީހަށް ހުށަހަޅުއްވައިފި އެވެ.

މީކާއީލް ފޮނުވާފައިވާ ސުވާލުކުރުމުގެ ނޯޓިސްގައި ވަނީ ހޯމް މިނިސްޓްރީގެ ދަށުން ހިންގަމުންދާ ޑިޕާޓްމަންޓް އޮފް ނޭޝަނަލް ރަޖިސްޓްރޭޝަންގެ ޑޭޓާބޭސް ބޭނުން ކޮށްގެން މީހުންގެ ޝަޚްސު އޮޅުވާލައި ޕީއެންސީއަށް މެންބާޝިޕް ފޯމު ފުރާވާކަން ހާމަވެފައިވާ ކަމަށެވެ.

އެކަމާ ގުޅިގެން މީކާއީލް ކުރަން ހުށަހަޅުއްވާފައިވާ ސުވާލަކީ މީހުންގެ ޒާތީ މައުލޫމާތު އިތުރަށް ރައްކާތެރި ކުރުމަށް އަޅަނީ ކޮން ފިޔަވަޅެއްތޯއާއި ސައްހަނޫން ފޯމު ތަކުގައި ހެކިންގެ ގޮތުގައި ސޮއިކޮށްފައިވާ ހޯމް މިނިސްޓްރީގެ އިސްވެރިންނާމެދު އެއްވެސް ފިޔަވަޅެއް އަޅާފައިވޭތޯ ސުވާލު ކުރަން އެދިފަ އެވެ.

މި މައްސަލައާ ގުޅިގެން ޕީއެންސީން މިއަދު ނެރުނު ބަޔާނެއްގައި ވަނީ އެ ޕާޓީން ހުށަހެޅި ފޯމްތަކުގެ ތެރޭގައި ސައްހަނޫން ފޯމްތަކެއް ހުރިކަން ފާހަގަ ކުރެވިފައިވާ ކަމަށެވެ.

އަދި ޕާޓީއަށް ހުށަހެޅޭ ފޯމުތަކުގެ ސައްހަކަން ކަށަވަރު ކުރެވޭނެ ނިޒާމެއް ޕާޓީގައި ގާއިމު ކުރެވިފައި ނެތްކަން ވެސް ފާހަގަ ކޮށްފައިވެ އެވެ.

މި މައްސަލަ މިހާރު އިލެކްޝަންސް ކޮމިޝަނާއި ފުލުހުން ވެސް ބަލަމުންދާކަން އަންގާފައިވާ ކަމަށް ވެސް އެ ބަޔާނުގައިވެ އެވެ.

މި ތަހުގީގަށް އެ ޕާޓީގެ ފުރިހަމަ އެއްބާރުލުން ދޭނެކަމަށް ޕީއެންސީން ޔަގީންކަން ދީފައިވެ އެވެ.

މިފަދަ ކަންކަމަކީ ޕީއެންސީން ހިތްވަރުދޭ ނުވަތަ ބޭނުންވާ ކަންކަމެއް ނޫންކަމަށް ބުނެ، އެއްވެސް މީހަކު އޭނާއަށް ނޭނގި ޕާޓީއަށް ވައްދާފައިވާނަމަ، އެކަން އަންގައިދިނުމަށް އެ ޕާޓީން ވަނީ އެދިފަ އެވެ.