ސައްހަ ނޫން ފޯމުތަކެއް ހުށަހެޅިފައިވޭ، އެކަން އަންނަނީ ބަލަމުން: ޕީއެންސީ

ސަރުކާރު ހިންގައި ޕީއެންސީގެ ނަމުގައި ސައްހަ ނޫން ފޯމްތަކެއް އިލެކްޝަންސް ކޮމިޝަން (އީސީ)އަށް ހުށަހެޅިވާތީ އެކަން ބަލަމުން އަންނަ ކަމަށް އެ ޕާޓިން ބުނެފި އެވެ.

ސިޔާސީ ޕާޓީތަކަށް ނިސްބަތްވާ މެމްބަރުން، ޕީއެންސީއަށް ވަގަށް ވައްދާ ކަމަށް ބުނާ މައްސަލަ ފެންމަތިވުމުން އީސީ އަދި ފުލުހުން އަންނަނީ އެ މައްސަލަ ބަލުންނެވެ.

ޕީއެންސީ އިން ނެރުނު ބަޔާނެއްގައި ބުނެފައިވަނީ ޕާޓީ އަށް މެމްބަރުން އިތުރު ކުރުމަށް މުޅި ރާއްޖެއަށް ހުޅުވާލައިގެން ހިންގި "މެމްބަޝިޕް ޑްރައިވް" ގައި ޕާޓީއަށް ހުށަހެޅި އެތައް ހާސް ފޯމެއް އިލެކްޝަންސް ކޮމިޝަނަށް ހުށަހަޅާފައިވަނިކޮށް މަދުން ނަމަވެސް ސައްހަ ނޫން ފޯމުތަކެއް ހުށަހެޅިފައިވާކަން އެ ޕާޓީ އަށް ވަނީ ފާހަގަ ކުރެވިފައިވާ ކަމަށެވެ.

ޕާޓީގެ އިދާރީ މުވައްޒަފުންގެ ބުރަ މަސައްކަތުން އިލެކްޝަންސް ޕޯޓަލް މެދުވެރިކޮށް ފޯމުތައް އަޕްލޯޑުކުރަމުން ދިޔަ ނަމަވެސް، ޕާޓީއަށް ލިބޭ ފޯމުތަކުގެ ސައްހަކަން ކަށަވަރު ކުރުމުގެ ގާބިލްކަން އެ ޕާޓީއަށް ލިބިފައިނުވާ ކަމަށް ވެސް ބަޔާނުގައިވެ އެވެ.

ވެރިކަން ކުރާ ޕީއެންސީން އިތުރަށް ބުނީ މި މައްސަލަ އިލެކްޝަންސް ކޮމިޝަނާއި، ފުލުހުން ބަލަމުންގެންދާކަން ޕާޓީއަށް އަންގާފައިވާކަމަށެވެ. އަދި އެ ޕާޓީން ފޯމުތައް ހުށަހެޅިފައިވާގޮތް ބަލަމުންދާ ކަން ފާހަގަ ބަޔާނުގައި ބުނަނީ ފުލުހުންނަށާއި އީސީއަށް ފުރިހަމަ އެއްބާލުން ދޭނެ ކަމަށެވެ.

ވަގު ފޯމުގެ މައްސަލަ ބޮޑުވެފައި އޮއްވާ، އެމްޑީޕީ ވައިކަރަދޫ ދާއިރާގެ މެންބަރު ހުސައިން ޒިޔާދު އާއި އެ ޕާޓީގެ ގައުމީ މަޖިލީހުގެ ބައެއް މެންބަރުންގެ އިތުރުން މަނަދޫ ދާއިރާގެ ކުރީގެ މެންބަރު މުޙައްމަދު ތޯރިގު ވެސް ޕީއެންސީއަށް ވައްދާފައިވާ މައްސަލަތަކެއް ވަނީ ސަމާލުކަމަށް އައިސްފަ އެވެ.