މޫސުން ގޯސްވުމާ ގުޅިގެން ޚާއްސަ ޓާސްކް ފޯހެއް އެކުލަވާލައިފި

ކުރިއަށް އޮތް ދުވަސްތަކުގައި ރާއްޖެއަށް މޫސުން ގޯސްވާނެކަމަށް ލަފާކުރެވޭތީ، ރައްޔިތުން ރައްކާތެރިކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޚާއްސަ ޓާސްކް ފޯހެއް އެކުލަވާލައްވައިފިއެވެ.

މި ޓާސްކް ފޯހުގައި ހިމެނެނީ އެމްއެންޑީއެފް، ޕޮލިސް އަދި އެންޑީއެމްއޭ އެވެ.

މޫސުމާބެހޭ ޤައުމީ އިދާރާއިން ލަފާކުރާ ގޮތުގައި މިއަދުން ފެށިގެން މި މަހުގެ 18 ވަނަ ދުވަހާ ހަމައަށް ރާއްޖޭގެ އެކި ހިސާބުތަކަށް ބޯކޮށް ވާރޭވެހި، އުދަ އަރާނެއެވެ.

ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާހިމް ހިލްމީ ވިދާޅުވީ ޓާސްކް ފޯހުގެ ޖޮއިންޓް އޮޕަރޭޝަން މަރުކަޒު ބަންޑާރަކޮށީގައި ޤާއިމްކޮށްފައިވާ ކަމަށެވެ. މާލޭގައި ވެލި ބަސްތާ ޖެހުމާއި ޕަންޕް ސްޓޭޝަންތައް ބޭނުންކުރުމަށް ސިފައިން ތައްޔާރަށް ތިބިކަމަށް އޭނާ ވިދާޅުވިއެވެ.

ކޮމިޝަނަރ އޮފް ޕޮލިސް ޢަލީ ޝުޖާޢު ވިދާޅުވީ ފުލުހުންވެސް މާލެއާއި އަތޮޅުތެރޭގައި ތައްޔާރަށްތިބި ކަމަށެވެ. ފެން ބޮޑުވާ ސަރަހައްދުތަކުގައި ވެހިކަލް ނުދުއްވުމަށާއި ފުލުހުންގެ އިރުޝާދުތަކަށް ބޯލެބުމަށް އޭނާ އެދިވަޑައިގަތެވެ.

އެންޑީއެމްއޭގެ ޗީފް އެގްޒެކެޓިވް ޙިސާން ޙަސަން ވިދާޅުވީ އެ އިދާރާގެ އިމަރޖެންސީ އޮޕަރޭޝަންސް އެކްޓިވޭޓްކޮށްފައިވާ ކަމަށެވެ. މާލޭގައި 57 އަށްވުރެ ގިނަ ތަންތަނުގައި ވެލިބަސްތާ ޖަހާފައިވާކަން އޭނާ ފާހަގަކުރެއްވިއެވެ.

މޫސުމީ ވިއްސާރައިން ލިބިދާނެ ގެއްލުންތައް ކުޑަ ކުރުމަށް ފަރުދީ ޒިންމާ އަދާކުރުމަށް އޮފިޝަލުން އެދިވަޑައިގަތެވެ. މީގެ ތެރޭގައި ސައިކަލު ރައްކާތެރި ސަރަހައްދުތަކުގައި ޕާކުކުރުމާއި، އަގުބޮޑެތި މުދާތައް ރައްކާތެރި ކުރުން ހިމެނެއެވެ.