އެއް އަހަރު ތެރޭ މުދަލު ޒަކާތަށް 101 މިލިއަން ލިބި ރެކޯޑް ހަދައިފި

މިދިޔަ އަހަރަކީ ތާރީހުގައި ވެސް މުދަލު ޒަކާތުގެ ގޮތުގައި އެންމެ ބޮޑު އަދަދަކުން ފައިސާ ލިބުނު އަހަރު ކަމުގައި އިސްލާމިކް މިނިސްޓްރީން މިއަދު ބުނެފި އެވެ.

އެ މިނިސްޓްރީން ބުނީ މިދިޔަ އަހަރު މުދަލު ޒަކާތުގެ ގޮތުގައި 101.9 މިލިއަން ރުފިޔާ ލިބިފައިވާ ކަމަށެވެ.

އިސްލާމިކް މިނިސްޓްރީން ބުނީ، 2023ވަނަ އަހަރުގެ ޑިސެމްބަރު މަހުގެ 18ވަނަ ދުވަހު ރައީސް ޑރ. މުޙައްމަދު މުއިއްޒު އުފެއްދެވި ޒަކާތު ހައުސްއަކީ ރާއްޖޭގެ ޒަކާތުގެ ނިޒާމު ހަރުދަނާކޮށް ތަރައްގީ ކުރުމަށް އެޅިގެން ދިޔަ ވަރަށް މުހިންމު ފިޔަވަޅެއް ކަމަށެވެ.

އަދި މިދިޔަ އަހަރު ޒަކާތު ހައުސް އިން ޒަކާތާ ގުޅޭ ކަންކަމަށް އަހުލުވެރިކޮށް ހޭލުންތެރި ކުރުވުމަށް ޓަކައި ތަފާތު ހަރަކާތްތައް ކުރިއަށް ގެންގޮސްފައިވާ ކަން މިނިސްޓްރީން ފާހަގަކޮށްފައިވެ އެވެ.

ނަތީޖާއެއްގެ ގޮތުން ދިވެހި ރައްޔިތުން ޒަކާތުގެ ކަންކަމަށް ފަތުވާތެރިވާ މިންވަރު އިތުރުވެފައިވާ ކަން މޯލްޑިވްސް އިންލޭންޑް ރެވެނިއުއިން އެކުލަވައިލި ތަފާސް ހިސާބު ތަކުން ދައްކާ ކަމަށް މިނިސްޓްރީ ބުނެ އެވެ.

"މިއީ ރާއްޖޭގެ ތާރީހުގައ ވެސް އެއް އަހަރެއްގެތެރޭ މުދަލު ޒަކާތުގެ ގޮތުގައި ލިބިފައިވާ އެންމެ ބޮޑު އަދަދުކަން ފާހަގަ ކުރަން،" އެ މިނިސްޓްރީން ބުންޏެވެ.

އިތުރަށް މިނިސްޓްރީން ބުނީ، ޒަކާތުގެ ގޮތުގައި ލިބޭ ފައިސަ އަބަދު ވެސް ހަރަދު ކުރެވެމުން ދަނީ ޝަރުއީ އުސޫލު ތަކާއި މިންގަޑު ތަކުގައި ކަނޑައަޅާފައިވާ ގޮތުގެ މަތިން އޭގެ ހައްގުވެރީންގެ މައްޗަށް ކަމަށެވެ.