ސައުދީއާއެކު އޮންނަ ގުޅުން ވަރުގަދަ ކުރަން ރައީސް މުއިއްޒު އަހަމިއްޔަތުކަން ދެއްވާ: ޝަހީމް

ސައުދީ އަރަބިއްޔާއާއެކު އޮންނަ އަހުވަންތަ ގުޅުން އިތުރަށް ވަރުގަދަ ކުރުމަކީ ރައީސް ޑރ. މުޙައްމަދު މުއިއްޒު ވަރަށް ބޮޑު އަހަމިއްޔަތުކަމެއް ދެއްވާ ކަމެއްކަމަށާއި، މި ގުޅުން އަބަދުވެސް ވަރުގަދަ ކަމާއެކު ދެމިއޮންނާނެކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެއްޖެ އެވެ.

ޝަހީމް މިހެން ވިދާޅުވީ ސައުދީގެ ހައްޖާއި އުމްރާއާ ބެހޭ ވަޒީރު ޑރ. ތައުފީގު ރަބީއާގެ ދައުވަތަކަށް އެ ގައުމަށް މިހާރު ކުރައްވާ ދަތުރުފުޅުގެ ތެރެއިން މިއަދު އެ މަނިކުފާނާއެކު ބެއްވެވި ބައްދަލުކުރެއްވުގަ އެވެ.

މި ބައްދަލުކުރެއްވުމުގައި ޝަހީމް ވަނީ، ހައްޖާއި އުމްރާގެ ހިދުމަތުގެ ފެންވަރު ރަނގަޅު ކުރުމަށާއި ދެ ހަރަމްފުޅަށް ހިދުމަތް ކުރުމުގައި ސައުދީ ރަސްގެފާނު ސަލްމާން ބިން އަބްދުލްއަޒީޒު ކުރައްވަމުން ގެންދަވާ މަސައްކަތްޕުޅަށް ޝުކުރު އަދާ ކުރައްވާފަ އެވެ.

އަދި ދުނިޔޭގެ ކަންކޮޅު ތަކުން އަންނަ ހައްޖުވެރީންނަށް ކަންކަން ފަސޭހަކޮށްދިނުމަށް ރަސްގެފާނު ކުރައްވާ މަސައްކަތްޕުޅުތައް ފާހަގަ ކުރައްވައި އެކަމަށް ވެސް ޝަހީމް ޝުކުރު އަދާ ކުރެއްވި އެވެ.

މީގެ އިތުރުން، ދިވެހި ހައްޖުވެރިންނަށް ދިމާވާ ދަތިތައް ހައްލު ކުރެއްވުމަށް ސައުދީގެ މިނިސްޓްރީ އޮފް ހައްޖު އެންޑް އުމްރާއިން އަބަދު ވެސް ދެމުން އަންނަ އެހީތެރިކަން މިނިސްޓަރު ފާހަގަ ކުރެއްވި އެވެ.

މިނިސްޓަރު ޝަހީމް ވިދާޅުވީ ސައުދީއާ އޮންނަ އަހުވަންތަ ގުޅުން އިތުރަށް ވަރުގަދަ ކުރުމަކީ ރައީސް ޑރ. މުޙައްމަދު މުއިއްޒު ވަރަށް ބޮޑު އަހަމިއްޔަތުކަމެއް ދެއްވާ ކަމެއްކަމަށާއި، މި ގުޅުން އަބަދުވެސް ވަރުގަދަ ކަމާއެކު ދެމި އޮންނާނެ ކަމަށެވެ.

ސައުދީގެ ހައްޖު މިނިސްޓަރުގެ ވާހަކަފުޅުގައި ރާއްޖެއިން ހައްޖުގެ ކަންކަމުގައި ބަހައްޓާ މުހިންމުކަން ފާހަގަ ކުރައްވާފައިވެ އެވެ.  

މި ބައްދަލުކުރެއްވުމުގައި މިނިސްޓަރު ޝަހީމް ވަނީ ޑރ. ތައުފީގު ރާއްޖެ ވަޑައިގެންނެވުމަށް ދައުވަތު އަރުއްވާފަ އެވެ.

އިސްލާމިކް މިނިސްޓްރީން ބުނީ މިނިސްޓަރުގެ މި ދަތުރުފުޅުގެ ތެރެއިން 1446 ވަނަ އަހަރުގެ ހައްޖު އެއްބަސްވުމުގައި ދިވެހި ސަރުކާރާއި ސައުދީ ސަރުކާރާއިދެމެދު ސޮއިކުރާ ގޮތަށް ހަމަޖެހިފައިވާ ކަމަށެވެ.