މާދަމާއިން ފެށިގެން މޫސުން ގޯސްވެ، ކަނޑުތައް ގަދަ ވާނެ: މެޓް

ކަނޑު ގަދަ ދުވަހެއްގައި ލޯންޗަކާ ދޯންޏެއް ދަތުރު ކުރަނީ -- ފޮޓޯ ކްރެޑިޓް/ ސަން

މާދަމާ މެންދުރު ފަހު ނޫނީ ރޭގަނޑުން ފެށިގެން އަނެއްކާވެސް ރާއްޖެއަށް ވިއްސާރަ ކުރަން ފަށާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން މިއަދު އިންޒާރު ދީފިއެވެ.

މިއަދު މޫސުން ރީތިކޮށް އޮތް ނަމަވެސް، ކުރިއަށް އޮތް ދުވަސްތަކުގައި މޫސުން ގޯސްވެ، ވައި އަދި ކަނޑު ގަދަވާނެ ކަމަށް މެޓުން ބުނެފައިވެއެވެ.

މި އަހަރު ފެށުނީ ވެސް ރާއްޖެއަށް ބޮޑު ވިއްސާރަގަނޑަކާ އެކު އެވެ. އޭގެ ފަހުން ކުޑަ ދުވަސްކޮޅަކު މޫސުން ރީތިކޮށްލާފައި އޮތުމަށް ފަހު އިއްޔެ އަނެއްކާ ވެސް ރާއްޖޭގެ އެކި ހިސާބުތަކަށް ވިއްސާރަކުރިޔެވެ. މެޓު އޮފީހުން ބުނީ މޫސުން އަދިވެސް އަލިނުކުރާ ކަމަށެވެ.

މެޓު އޮފީހުގެ އޮފިޝަލަކު ވިދާޅުވި ގޮތުގައި ރާއްޖޭގެ އިރުމައްޗަށްވާ ގޮތަށް، ސްރީ ލަންކާ ކައިރީގައި ބޯ ވިލާތައް ދައުރުވާ ސާކިއުލޭޝަންތަކެއް އުޅޭ ކަމަށާއި، އޭގެ އަސަރު ރާއްޖެއަށް ކުރާނެ ކަމަށެވެ. އަދި މާދަމާ މެންދުރު ފަހުން ނޫނީ ރޭގަނޑުން ފެށިގެން ކުރިއަށް އޮތް ފަސް ދުވަހު މޫސުން ގޯސްވާނެ ކަމަށް ބެލެވޭ ކަމަށް އޭނާ ވިދާޅުވިއެވެ.

އެ ވިއްސާރައިގައި ދޭތެރެ ދޭތެރެއިން، ރާއްޖޭގެ އެކި ހިސާބުތަކަށް ގުގުރުމާ އެކު ބޯކޮށް ވާރޭވެހޭނެ ކަމަށާއި، ބުދަ ދުވަހުން ފެށިގެން ހުކުރު ދުވަހާ ހަމައަށް ވައިގަދަވެ، އޭގެ ސަބަބުން ކަނޑުތައް ގަދަވާނެ ކަމަށް އޮފިޝަލް ވިދާޅުވިއެވެ. އަދި ވިލާގަނޑު އަލިކޮށްލާނެ ކަމަށް ބެލެވެނީ އަންނަ ހޮނިހިރު ދުވަހުގެ ފަހުން ކަމަށްވެސް އޭނާ ވިދާޅުވިއެވެ.

މޫސުން