ވެރިކަން ވައްޓާލަން މަސައްކަތްކުރެއްވި ކަމަށް އަލީ އާޒިމް އިއުތިރާފުވެއްޖެ

މެދު ހެންވޭރު ދާއިރާގެ ކުރީގެ މެންބަރު އަލީ އާޒިމް

ރައީސް މުޙައްމަދު މުޢިއްޒުގެ ވެރިކަން ވައްޓާލުމަށް މަސައްކަތްކުރެއްވި ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމް ވިދާޅުވެއްޖެއެވެ.

އާޒިމް މިހެން ވިދާޅުވެފައިވަނީ ރާއްޖެޓީވީގެ "ފަށާއިރު" ޕްރޮގްރާމްގައި ކުރެވުނު ސުވާލަކަށް ޖަވާބުދެއްވަމުންނެވެ.

އާޒިމް ވިދާޅުވީ މަޖިލިސް މެންބަރެއްގެ ހައިސިއްޔަތުން، މަޖިލީހުގެ ތެރެއިން އޮންނަ އުސޫލުތަކާއި ހަމަތަކުގެ ތެރެއިން ވެރިކަން ބަދަލުކުރުމަށް މަސައްކަތްކުރެއްވި ކަމަށެވެ. އަދި އެ ދުވަހު އެކަން ކުރެވުނުނަމަ، މިއަދު މި ދެކޭ ދަތި އުނދަގޫތަކެއް ނުފެންނާނެ ކަމަށް ޤަބޫލުކުރައްވާ ކަމަށްވެސް ވިދާޅުވިއެވެ.

މީގެއިތުރުން އާޒިމް ވިދާޅުވީ ދައުރު ނިމެންދެންވެސް ރައީސް މުޢިއްޒުގެ ވެރިކަން އޮންނަންޖެހޭ ކަމަށް ޤަބޫލުނުކުރައްވާ ކަމަށެވެ. އަދި އޮންނަ ހަމަތަކާއި އުސޫލުތަކުގެ ތެރެއިން ވެރިކަން ބަދަލުކުރުމަކީ ކުރަންޖެހޭ ކަމެއް ކަމަށް ވިދާޅުވިއެވެ.

ނިމިދިޔަ 19 ވަނަ މަޖިލީހުން ވަނީ، އެމްޑީޕީގެ މެންބަރުންގެ ވޯޓުން އެކަނިވެސް ރައީސްއާއި ނައިބު ރައީސް މަޤާމުން ވަކިކުރެވޭގޮތަށް ގަވާއިދު އިޞްލާޙުކޮށްފައެވެ. މި އިޞްލާޙު ހުށަހެޅުއްވީ އަލީ އާޒިމްކަން ފާހަގަކޮށްލެވެއެވެ.

އާޒިމުގެ މިވާހަކަތަކުން ރައީސް މުޢިއްޒުގެ ވެރިކަމާ ދެކޮޅަށް އިދިކޮޅު ފަރާތްތަކުން ކުރި މަސައްކަތްތަކުގެ ތަފްޞީލު މިވަނީ އާންމުންނަށް ހާމަވެގެން ގޮސްފައެވެ.

އެމްޑީޕީ