އެމެރިކާގެ އަލިފާނުގެ ހާދިސާ: މިހާތަނަށް 13 މީހުން މަރުވެ 153,000 ގެދޮރުދޫކޮށް ދާންޖެހިއްޖެ

މިދިޔަ ހަފްތާގެ އަންގާރަ ދުވަހުން ފެށިގެން އެމެރިކާގެ ލޮސް އޭންޖަލަސް (އެލްއޭ) ގައި ރޯވި އަލިފާން އަދިވެސް ނިއްވާނުލެވޭކަމަށް އެ ގައުމުގެ ކަމާ ބެހޭ ފަރާތްތަކުން ބުނެފިއެވެ.

މިހާތަނަށް 6 ސަރަހައްދަކަށް މި އަލިފާންގަނޑު ފެތުރިފައިވާއިރު، މި ހާދިސާއާ ގުޅިގެން 11 މީހަކު ވަނީ މަރުވެފައެވެ.

ގަދަ ވަޔާއި ގިނަ ދުވަހު ވާރޭ ނުވެހުމުގެ ސަބަބުން ރޯވިކަމަށް ލަފާކުރާ މި އަލިފާންގަނޑު އިއްޔެ އެ ސަރަހައްދުގެ ބްރެންޓްވުޑް ނެއިބާހުޑްއާ ދިމާލަށް މިސްރާބުޖެހުމާ ގުޅިގެން އެ ސަރަހައްދުން މީހުން ހުސްކުރުމަށް އަމުރު ނެރެފައިވެއެވެ. އެލްއޭގެ ކައުންޓީ އޮފީސް އޮފް އެމަޖެންސީ މެނޭޖްމަންޓްގެ ތަރުޖަމާނު ޖީސަސް ރުއިޒް ވިދާޅުވީ، އަލިފާންގަނޑު ވަރަށް އަވަސް ސްޕީޑެއްގައި ފެތުރެމުންދާކަމަށެވެ.

މި ހާދިސާއާ ގުޅިގެން އެލްއޭގައި އުޅޭ 153,000 މީހުން އެމީހުންގެ ގެދޮރު ދޫކޮށް ގޮސްފައިވާއިރު، 12,000 އަށްވުރެ ގިނަ އިމާރާތް ވަނީ އަލިފާނުގައި އަނދައިގެން ގޮސްފައެވެ. މިއީ އެލްއޭގެ ތާރީޚުގައި ކުރިމަތިވި އެންމެ ނުރައްކާތެރި ހާދިސާއަށްވާއިރު، މި ހާދިސާގައި މިހާތަނަށް ލިބުނު ގެއްލުމުގެ އަދަދު 8 ބިލިއަން ޑޮލަރަށްވުރެ މައްޗަށް އަރާނެކަމަށް ވަނީ ލަފާކޮށްފައެވެ.

އަލިފާން ރޯވެފައިވާ ސަރަހައްދުތަކުގެ ތެރޭގައި ޕެލިސައިޑްސް، އީޓަން، ހާސްޓް، ލިޑިއާ، ކެނެތު އަދި އާޗަރ ހިމެނެއެވެ. މި ސަރަހައްދުތަކުގެ ތެރެއިން އެންމެ ބޮޑަށް ގެއްލުން ލިބިފައިވަނީ ޕެލިސައިޑްސް ސަރަހައްދަށެވެ. އެމެރިކާގެ އަލިފާން ނިއްވާ ފަރާތްތަކުގެ އިތުރުން ކެނެޑާއިން ވެސް އަންނަނީ މި އަލިފާންގަނޑު ނިއްވުމުގައި އެހީތެރިކަން ފޯރުކޮށްދެމުންނެވެ.