ސަހަރާ ކޮނުނުއިރު ފެން ހިންދާ ޕަންޕުގެ ބައެއް ކައުންސިލުން ނަގައިފި

ފެން ހިންދާ ޕަންޕުގެ ބައެއް ނަގާފައި --

މާފަންނު ސަހަރާ ކޮނުނުއިރު ފެން ހިންދަން ބޭނުން ކުރާ ސްޓޯމް ވޯޓާ ޕަންޕުގެ ބައެއް މާލެ ސިޓީ ކައުންސިލުން ނަގާފައިވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި މުއްތަލިބު ވިދާޅުވީ މާފަންނު ސަހަރާ ކޮނުމުގެ މަސައްކަތް ކުރިއިރު މާލޭ ހުޅަނގު އުތުރު ސަރަހައްދުގައި ހެދޭ ފެންގަނޑު ހިންދަން ބޭނުން ކުރަމުން އަންނަ ސްޓޯމް ވޯޓާ ޕަންޕުގެ ބައެއް ސިޓީ ކައުންސިލުން ނަގާފައިވާ ކަމަށެވެ.

ކައުންސިލުން، މިނިސްޓްރީއަށް އެގުމަކާ ނުލާ އެކަން ކުރުމުގެ ސަބަބުން އެ ސަރަހައްދުގައި މި ދުވަސްކޮޅު ފެންބޮޑުވުން އިތުވެފައިވާ ކަން މިނިސްޓަރު ފާހަގަ ކުރެއްވި އެވެ. އަދި އެ މައްސަލަ ހައްލުކޮށް ޕަމްޕުތައް އަލުން ބޭނުން ކުރެވޭ ގޮތް ހެދުމުގެ މަސައްކަތް މިހާރު ކުރަމުން އަންނަ ކަމަށް ވެސް މިނިސްޓަރު މުއްތަލިބު ވިދާޅުވި އެވެ.

މާލެއަށް ވާރޭ ވެހިލާއިރަށް ހިނގައި ބިނގާވެ އުޅެންދަތިވާ ވަރަށް މަގުތަކުގައި ހެނދޭ ފެންގަނޑު ހަފްތާއެއް ވަންދެން ފެން ނުހިނދި އޮވެ އެވެ.

މި ރަށުގެ ބައެއް ހިސާބުތަކުގައި ފައިގެ ތަނބިކައްޓަށް ވުރެ މައްޗަށް ފެންގަނޑު އަރާފައި އޮންނަ އިރު އަނެއްބައި ހިސާބުތަކުގައި ކަކުލާ ހިސާބަށް ވެސް ބައެއް ފަހަރު ފެންގަނޑު އަރާފައި އޮވެ އެވެ.

މިހެން ގިނަ ފަހަރަށް ދިމާވަނީ ވަށައިގެން ހުންނަ ކާނު ތަކަށް އެޅޭ ކުނި ގަވާއިދުން ސާފު ނުކުރެވި، އެތަންތަން ބެދުމުގެ ސަބަބުންނެވެ.

ކޮންސްޓްރަކްޝަން މިނިސްޓަރު މާލެ ސިޓީ ކައުންސިލް