އެމްއެމްޕީއާރްސީގެ މިއަހަރުގެ ފުރަތަމަ ބޯޑު ބައްދަލުވުން އުކުޅަހުގައި ބާއްވައިފި

އެމްއެމްޕީއާރުސީ ބޯޑު ބައްދަލުވުމުގެ ތެރެއިން

މި ސަރުކާރުގެ ފަރާތުން ލޯކަލް ޓްއަރިޒަމަށް އިސްކަންދޭކަން ހާމަކޮށްދިނުމަށްޓަކައި އެމްއެމްޕީއާރްސީގެ މިއަހަރުގެ ފުރަތަމަ ބޯޑު ބައްދަލުވުން އއ. އުކުޅަސް ކޮންވެންޝަން ސެންޓަރުގައި ބާއްވައިފިއެވެ.

މި ބައްދަލުވުމުގައި އެމްއެމްޕީއާރްސީގެ މެނޭޖިންގ ޑިރެކްޓަރު އިބްރާހިމް ޝިއުރީއާއި، ޗެއަރމަން އަބްދުﷲ ޣިޔާސް ރިޔާޒުގެ އިތުރުން ބޯޑު ޑިރެކްޓަރުން ބައިވެރިވެވަޑައިގެންނެވިއެވެ.

ބައްދަލުވުމުގެ މަޤްޞަދަކީ ލޯކަލް ޓުއަރިޒަމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ދެއްވާ އިސްކަން ހާމަކޮށްދިނުމާއި، އެމްއެމްޕީއާރްސީން ފަތުރުވެރިކަމުގެ ދާއިރާގެ ހުރިހާ ފަންތިއެއްގެ ފަރާތްތަކާއެކު މަސައްކަތްކުރުމަށް ތައްޔާރަށް ހުރިކަން އަންގައިދިނުން ކަމަށް ޝިއުރީ ވިދާޅުވިއެވެ.

މި ދަތުރުގައި އެމްއެމްޕީއާރްސީގެ ޓީމުން އުކުޅަހުގެ ކައުންސިލާއި އެ ރަށުގައި ހަރަކާތްތެރިވާ ލޯކަލް ޓުއަރިޒަމް ވިޔަފާރިވެރިންނާ ބައްދަލުކުރެއްވިއެވެ. އުކުޅަހަކީ ރާއްޖޭގައި ފުޅާ ދާއިރާއެއްގައި ލޯކަލް ޓުއަރިޒަމްގެ ވިޔަފާރި ކުރާ ރަށަކަށްވުމާއެކު، މި ބައްދަލުވުން އެ ރަށުގައި ބޭއްވުމަކީ ވަރަށް މުހިންމު ކަމެއް ކަމުގައި ފާހަގަކުރެވެއެވެ.

އެމްއެމްޕީއާރްސީއަކީ ރާއްޖޭގެ ފަތުރުވެރިކަން އިޝްތިހާރުކުރުމާ ގުޅޭ މަސައްކަތްތައް ކުރުމުގެ ޒިންމާ އޮންނަ ދައުލަތުގެ ކުންފުންޏެކެވެ. މި ބައްދަލުވުމަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށް އެޅޭ މުހިންމު ފިޔަވަޅެއްގެ ގޮތުގައި ބެލެވެއެވެ.

އެމްއެމްޕީއާރުސީ