ޕޮޓާގެ ފުރަތަމަ މެޗުން އެސްޓަން ވިލާ އަތުން 2-1 އިން ވެސްޓް ހޭމް ބަލިވެއްޖެ

ކޯޗު ގްރަހަމް ޕޮޓާ

ވެސްޓް ހޭމް ޔުނައިޓެޑުގެ އައު ކޯޗު ގްރަހަމް ޕޮޓާގެ އިރުޝާދުގެ ދަށުން ކުޅުނު ފުރަތަމަ މެޗުން އެސްޓަން ވިލާ އަތުން 2-1 އިން ވެސްޓް ހޭމް ބަލިވެއްޖެއެވެ.

އިނގިރޭސި އެފްއޭ ކަޕްގެ ތިންވަނަ ބުރުގައި އެސްޓަން ވިލާއާ ދެކޮޅަށް ކުޅުނު މި މެޗުގެ ނުވަވަނަ މިނިޓުގައި ވެސްޓް ހޭމްގެ ލޫކަސް ޕަކޭޓާ ލަނޑެއް ޖަހައި އެ ޓީމަށް ކުރި ހޯދައިދިނެވެ. ނަމަވެސް ދެވަނަ ހާފުގައި އެސްޓަން ވިލާއިން ކުޅުން ރަނގަޅުކޮށް، 71 ވަނަ މިނިޓުގައި އަމަދޫ އޮނާނާ އަދި 76 ވަނަ މިނިޓުގައި މޯގަން ރޮޖާ ލަނޑު ޖަހައިދީ އެޓީމު މޮޅުކޮށްދިނެވެ.

ދެ އަހަރެއްހާ ދުވަހު ކޯޗިންގ އާ ދުރުގައި ހުރުމަށްފަހު އެނބުރި އައި ގްރަހަމް ޕޮޓާ ވެސްޓް ހޭމްއާ ހަވާލުވެފައިވަނީ މިދިޔަ ބުރާސްފަތި ދުވަހުއެވެ. މި މެޗަށް ވެސްޓް ހޭމް ނިކުތީ ޕޮޓާގެ އިރުޝާދުގެ ދަށުން އެންމެ ފަރިތަކުރުމެއް ބޭއްވުމަށް ފަހުގައެވެ.

ސީޒަނުގެ ކުރިއަށް ހުރި މެޗުތަކަށް ވެސްޓް ހޭމް ނިކުންނައިރު، އެ ޓީމަށް ވަނީ އަނިޔާގެ ގިނަ މައްސަލަތަކެއް ކުރިމަތިވެފައެވެ. މިގޮތުން މިކޭލް އެންޓޯނިއޯ، ޖެރޮޑް ބޮވެން އަދި ނިކްލަސް ފުލްކްރޫގް ފަދަ މުހިންމު ކުޅުންތެރިންނަށް އަނިޔާވެފައިވުމަކީ ޓީމަށް ކުރިމަތިވެފައިވާ ބޮޑު ގޮންޖެހުމެކެވެ.

މި ސީޒަނުގެ މިހާ ހިސާބަށް އައިރު ލީގުގައި ހިމެނޭ އިތުރު ކުލަބުތަކުންވެސް ކޯޗުން ބަދަލުކޮށްފައިވާކަން ފާހަގަކުރެވެއެވެ. އެގޮތުން އެވަޓަން އިންވެސް ވަނީ އެޓީމުގެ ކޯޗް ވަކިކޮށްފައެވެ. އަދި ވަރަށް އަވަހަށް އެޓީމަށްވެސް އާ ކޯޗަކު ހަމަޖެހިގެން ދާނެކަމަށް ބެލެވެއެވެ.

އިނގިރޭސި ލީގު ކަޕް