މޫސުން ގޯސްވެ ބައެއް އަތޮޅުތަކަށް ރީނދޫ އަދި ހުދު ސަމާލު ނެރެފި

ރާއްޖޭގެ މޫސުން މިދުވަސްކޮޅު އަނެއްކާވެސް މިވަނީ ވަރަށް ބޮޑަށް ގޯސްވެފައި

މޫސުން ގޯސްވާނެކަމަށް ލަފާކޮށް، މޫސުމާބެހޭ އިދާރާ (މެޓް އޮފީސް) އިން ބައެއް އަތޮޅުތަކަށް ރީނދޫ އަދި އަނެއްބައި އަތޮޅުތަކަށް ހުނދު ސަމާލު ނެރެފިއެވެ.

ރީނދޫ ސަމާލު ނެރެފައި ވަނީ ށ އަތޮޅުން ފެށިގެން ތ އަތޮޅަށެވެ. މި ސަމާލު ދެމިއޮންނާނީ މިއަދު ހެނދުނު 9:00 އިން ފެށިގެން މެންދުރު ފަހު 13:00 އާ ހަމައަށެވެ.

ހުދު ސަމާލު ނެރެފައި ވަނީ ހއ އަތޮޅުން ފެށިގެން ލ އަތޮޅަށެވެ. މި ސަމާލު ދެމިއޮންނާނީ މިއަދު ހެނދުނު 8:45 އިން މެންދުރުފަހު 14:00 އާ ހަމައަށެވެ.

މެޓް އޮފީހުން ބުނެފައިވަނީ މި ސަރަހައްދުތަކަށް ބޯކޮށް ވާރޭވެހުމާއެކު ގުގުރާނެކަމަށް ލަފާކުރެވޭ ކަމަށެވެ. އުތުރާއި މެދު ރާއްޖެތެރޭގެ އެކި ހިސާބަށް ވިއްސާރަކުރުމާއެކު ގުގުރާނެކަމަށާއި، ބައެއް ރަށްތަކަށް ބޯކޮށް ވާރޭވެހޭނެކަމަށް ލަފާކުރެވޭކަމަށް އެ އިދާރާއިން މަޢުލޫމާތު ދީފައިވެއެވެ.

ހަމައެއާއެކު، ދެކުނުގެ އެކި ހިސާބަށް ކެރީގެ އަސަރު ފޯރާނެކަމަށާއި، ގުގުރާނެކަމަށް ލަފާކޮށްފައިވެއެވެ. މިކަންކަމަށް ރިޢާޔަތްކޮށް، ހުރިހާ ފަރާތްތަކުންވެސް މޫސުމަށް ސަމާލުވުމަށް މެޓް އޮފީހުން އިލްތިމާސްކޮށްފައިވެއެވެ.

މި މޫސުމުގެ ހާލަތު މިއަދު ހަވީރު 18:00 އާ ހަމައަށް ދެމިގެންދާނެކަމަށް މެޓް އޮފީހުން ލަފާކޮށްފައިވެއެވެ.

މޫސުން