މިއަހަރުގެ ޙައްޖު ފުރުޝަތު ލިބުނު މީހުންނަށް ދަޢުވަތު ފޮނުވަން ފަށައިފި

ހައްޖަށް ދިއުމަށް ގިނަބަޔަކު ވަނީ ފައިސާ ދައްކާފައި

މިއަހަރު ރާއްޖެއިން ޙައްޖަށް ދިއުމުގެ ފުރުޞަތު ލިބިފައިވާ މީހުންނަށް ދަޢުވަތު ފޮނުވަން ފަށައިފިއެވެ.

ޙައްޖު ކޯޕަރޭޝަންގެ މެނޭޖިން ޑިރެކްޓަރ އަޙްމަދު ޝަކީލް ވިދާޅުވިގޮތުގައި ދަޢުވަތު ފޮނުވަމުންދަނީ ޙައްޖު ކިއު ތަރުތީބުންނެވެ.

ޝަކީލް ވިދާޅުވީ މިދިޔަ އަހަރުގެ ޙައްޖުގެ މަޝާޢިރުގައި ފާހަގަކުރެވުނު ކަންކަން ރަނގަޅުކުރުމަށް މަސައްކަތްކުރަމުންދާ ކަމަށެވެ. މިގޮތުން މިމަހު ސަޢުދީ އަރަބިއްޔާގައި ބޭއްވޭ ޙައްޖު ކޮންފަރެންސްގައި މުތައްވިފުންނާ ބައްދަލުކޮށް މަޝްވަރާކުރާނެ ކަމަށް އޭނާ ވިދާޅުވިއެވެ.

މިއަހަރު ޙައްޖަށް މީހުން ގެންދިއުމަށް އިދާރީ ތައްޔާރީތައް ވަމުންދާ ކަމަށް ޝަކީލް ވިދާޅުވިއެވެ. އަދި މިނާގައި ފާހަގަކުރެވުނު ކަންތައްތަކަށް ރިޢާޔަތްކޮށް، އެފަދަ ކަންކަން ތަކުރާރުނުވާނެ ގޮތަށް ފިޔަވަޅު އަޅަމުންދާ ކަމަށްވެސް އޭނާ ވިދާޅުވިއެވެ.

ކޮންމެ އަހަރަކު ރާއްޖެއަށް ލިބޭ 1,000 ޙައްޖު ކޯޓާ މިހާރު ބަހާލަނީ ހަމައެކަނި ޙައްޖު ކޯޕަރޭޝަނަށެވެ. މީގެ އިތުރުން ސަރުކާރުން ނިންމަވާފައިވަނީ 50 ފަޤީރުން ޙައްޖަށް ފޮނުވުމަށެވެ.

ޙައްޖު ކޯޕަރޭޝަނުން މަޢުލޫމާތު ދެއްވާ ގޮތުގައި މިހާރު އެ ކޯޕަރޭޝަން މެދުވެރިކޮށް ޙައްޖުގެ އަޅުކަން އަދާކުރުމަށް ކިއުގައި 9,115 މީހުން އެބަ ތިއްބެވެ. މީގެ ތެރޭގައި 65 އަހަރުން ދަށުގެ 7,543 މީހުންނާއި 65 އަހަރާއި 75 އަހަރާ ދެމެދުގެ 1,461 މީހުން އަދި 75 އަހަރުން މަތީގެ 111 މީހުން ހިމެނެއެވެ.

ހައްޖު ކޯޕަރޭޝަން