ސަފާރީން ކަނޑަށް ވެއްޓުނު މީހާ މަރުވެފައި އޮއްވާ ފެނިއްޖެ

މަރުވެފައިވާ މީހާ ނެގުމުގެ މަސައްކަތް ކުރަނީ / ފޮޓޯ: އެމްއެންޑީއެފް

ސަފާރީއަކުން ވެއްޓިގެން ހޯދަމުން ދިޔަ ދިވެހި މީހާ މަރުވެފައި އޮއްވައި މިއަދު ފެނިއްޖެއެވެ.

ސަފަރީއެއްގައި ދަތުރުކުރަމުން ދަނިކޮށް ކަނޑަށް ވެއްޓިގެން، ފުލުހުންނާއި ސިފައިން ގުޅިގެން މިއަދު ހޯދަން ފެށީ އަލީ އަރުޝަދު (35އ) ސީވީޑް، ނ. ހޮޅުދޫއެވެ.

ފުލުހުން ބުނާ ގޮތުގައި އަރުޝަދު ވެއްޓުނު މަންޒަރު ސަފާރީގެ ސީސީޓީވީ ފުޓޭޖުން ފެނެއެވެ. އަދި ވެއްޓެން ދިޔައިރު އޭނާގެ ބޯ ބޯޓުގެ އަރިމަތީގައި ޖެހިފައިވާކަން ވެސް ފާހަގަކުރެވިފައިވެއެވެ.

އަރުޝަދުގެ ހަށިގަނޑު ހޯދީ އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުންނެވެ. އޭނާ ގެއްލިގެން ސަފާރީން މިއަދު ރިޕޯޓްކުރުމާ ގުޅިގެން ފުލުހުންނާއި ސިފައިން ގުޅިގެން ހޯދުމުގެ މަސައްކަތް ފެށިއެވެ.

އެމްއެންޑީއެފުން ބުނިގޮތުގައި ސިފައިންގެ ޑައިވަރުންނަށް އަރުޝަދުގެ ހަށިގަނޑު ފެނުނީ ކަނޑުގެ 69 މީޓަރު އަޑިންނެވެ. އަދި އޭނާގެ ހަށިގަނޑު ވަނީ މިއަދު ހަވީރު 3:35 ހާއިރު ލޯންޗަށް ނަގާފައެވެ.

ފާހަގަކޮށްލެވޭ ގޮތުގައި މިއަދު ރިސޯޓެއްގައި ޗުއްޓީ ހޭދަކުރަމުން އައި ފަތުރުވެރިއަކު ވެސް ލޯންޗެއްގެ ބުރަފަތީގައި ޖެހި މަރުވިއެވެ. އެ ހާދިސާ ހިނގީ އދ. މިރިހި ރިސޯޓް ކައިރީގައެވެ.

އެމްއެންޑީއެފް ފުލުހުން