މިދިޔަ އަހަރު 56 ބިދޭސީން ގަވާއިދާ ޚިލާފަށް ރާއްޖެ އެތެރެވާން އުޅެނިކޮށް ހިފެހެއްޓި: އިމިގްރޭޝަން

މިދިޔަ އަހަރު ގަވާއިދާ ޚިލާފަށް ވައިގެ މަގުން ރާއްޖެއަށް އެތެރެވާން އުޅުނު 56 ބިދޭސީން ހިފެހެއްޓި ކަމަށް އިމިގްރޭޝަނުން ހާމަކޮށްފިއެވެ.

ޗީފް ޕްރިންސިޕަލް އިމިގްރޭޝަން އޮފިސަރ އަޙުމަދު ވަޙީދު ވިދާޅުވީ، މި ބިދޭސީން ހުއްޓުވުނީ ބޯޑަރުގައި މަސައްކަތްކުރާ އޮފިސަރުންގެ ހުޝިޔާރުކަމުން ކަމަށެވެ.

ވަޙީދު ފާހަގަކުރެއްވި ގޮތުގައި، ޝަޚްޞު އޮޅުވާލައިގެން ފޯޖު ޑޮކިއުމަންޓް ބޭނުންކޮށްގެން ރާއްޖެއަށް އެތެރެވާން މަސައްކަތްކުރާ އެތައް ބަޔަކު ތިބޭނެކަން ގަބޫލުކުރަން ޖެހެއެވެ. އެހެންނަމަވެސް، އަހަރެއްގެ ތެރޭގައި 56 މީހުން މިގޮތަށް ހިފެހެއްޓުމަކީ ވަރަށް ބޮޑު ކާމިޔާބެއް ކަމުގައި އޭނާ ވިދާޅުވިއެވެ.

އިމިގްރޭޝަނުން ހާމަކުރި ތަފާސްހިސާބުތަކުން ދައްކާގޮތުގައި، މިދިޔަ އަހަރުގެ ފުރަތަމަ ތިން މަހުގައި ވަގު ޕާސްޕޯޓާއި އައިޑީ ބޭނުންކޮށްގެން ރާއްޖެ އެތެރެވާން އުޅުނު އަށް މީހަކު ހިފެހެއްޓިފައިވެއެވެ. ދެވަނަ ކުއާޓަރުގައި ވަގު ޕާސްޕޯޓް އަދި ފޯޖުކުރި ޕާސްޕޯޓް ބޭނުންކޮށްގެން 17 މީހަކު ހިފެހެއްޓިފައިވެއެވެ.

ތިންވަނަ ކުއާޓަރުގައި އެންމެ ގިނަ ބާވަތްތަކުގެ މައްސަލަތައް ފާހަގަކުރެވުނެވެ. މީގެ ތެރޭގައި ވަގު ޕާސްޕޯޓް، އައިޑީ، ބަޔޯ ޕޭޖް، ފެންޓަސީ ޕާސްޕޯޓް، އެހެން މީހެއްގެ ގޮތުގައި ހެދުން، ވަގު ވިސާ އަދި ވަގު ސްޓޭމްޕް ބޭނުންކޮށްގެން ރާއްޖެ އެތެރެވާން އުޅުނު 20 މީހަކު ހިފެހެއްޓިފައިވެއެވެ.

އިމިގްރޭޝަނުން ދަނީ ރާއްޖެއަށް ގަވާއިދާ ޚިލާފަށް ބޯޑަރު ހުރަސްކޮށް ވައިގެ މަގުން އެތެރެވާން މަސައްކަތްކުރާ ފަރާތްތައް އަތުލައިގަތުމަށް މަސައްކަތްކޮށް، ސެކިއުރިޓީ ބަލަހައްޓަމުންނެވެ. މި މަސައްކަތުގެ ނަތީޖާއެއްގެ ގޮތުން މިދިޔަ އަހަރު 56 ބިދޭސީން ހިފެހެއްޓިފައިވާކަން ފާހަގަކުރެވެއެވެ.