ރެއާލް މެޑްރިޑް ސްޕެނިޝް ސުޕަ ކަޕްގެ ފައިނަލަށް ދަތުރު ކޮށްފި

ރޭގެ މެޗުގައި ރިއަލުން ވަނީ މޮޅުކުޅުމެއްދައްކާފައި

ސްޕެނިޝް ސުޕަ ކަޕް ސެމީ ފައިނަލުގައި މަޔޯކާ އަތުން 3-0 އިން މޮޅުވެ، ރެއާލް މެޑްރިޑުން ފައިނަލުގެ ފަހު ޖާގަ ކަށަވަރުކޮށްފިއެވެ.

އާދިއްތަ ދުވަހު ކުޅޭ ފައިނަލުގައި، ރެއާލުން ނުކުންނާނީ ބާސެލޯނާއާ ދެކޮޅަށެވެ. މިއީ މިދިޔަ އަހަރުގެ ފައިނަލުގައި ވެސް ބައްދަލުކުރި ދެ ޓީމެވެ.

ޖިއްދާގެ ކިންގްސް އަބްދުﷲ ސްޕޯޓްސް ސިޓީގައި ކުޅުނު މެޗުގައި މަޔޯކާއިން ވަނީ ރެއާލަށް ރަނގަޅު ފައިޓެއް ދީފައެވެ. ނަމަވެސް ރެއާލުން ލީޑުނެގީ 63 ވަނަ މިނިޓުގައި ޖޫޑް ބެލިންހަމް ޖެހި ގޯލުންނެވެ. މިއީ، ބެލިންހަމް އެންމެ ފަހުން ކުޅުނު ނުވަ މެޗުން ޖެހި ހަތްވަނަ ގޯލެވެ.

މަޔޯކާއިން ނަތީޖާ ހަމަހަމަކުރެވޭތޯ ގިނަ މަސައްކަތްތަކެއް ކުރި ނަމަވެސް އެކަން ކާމިޔާބެއްނުވިއެވެ. ރެއާލުން ވަނީ މެޗުގެ އިތުރު ވަގުތުގައި އަދި ދެ ގޯލު ޖަހައިފައެވެ. އޭގެ ތެރެއިން އެއް ގޯލަކީ މަޔޯކާގެ މާޓިން ވަލްޖެންޓް އަތުން ބައިކޮޅަށް ވަން ގޯލެކެވެ. އަނެއް ގޯލު ޖެހީ މެޗުގައި މޮޅު ކުޅުމެއް ދެއްކި ރޮޑްރީގޯއެވެ.

ރެއާލުން ސުޕަ ކަޕް 13 ފަހަރު ކާމިޔާބުކޮށްފައިވާއިރު، އެންމެ ގިނަ ފަހަރު ސުޕަ ކަޕް ތަށި އުފުލާލި ޓީމަކީ 14 ފަހަރު ޗެމްޕިއަންކަން ހޯދި ބާސެލޯނާއެވެ. މިފަހަރުގެ ފައިނަލުގައި މި ދެ ޓީމު ބައްދަލުވުމުން، މި ވާދަވެރިކަން އިތުރަށް ބޮޑުވެގެން ދާނެކަމަށް ބެލެވެއެވެ.

ރިއަލް މެޑްރިޑް