އުމްރާއަށް ގެންގޮސް ހާލުގައި ޖެއްސި މީހުން ހޮނިހިރު ދުވަހު ރާއްޖެ ގެންނަނީ

އަލްހިޖުރަ ޓްރެވެލްސް އެންޑް ޓުއާސްގެ ހަވާލުގައި އުމްރާއަށް ގޮސް އަނބުރާ ނާދެވި ހާލުގައި ޖެހުނު މީހުން އަންނަ ހޮނިހިރު ދުވަހު މާލެ ގެންނަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.

އަލްހިޖުރަ ގުރޫޕުން ގެންދިޔަ 23 މީހަކު އުމްރާގެ އަޅުކަން ނިމިގެން އަނބުރާ ރާއްޖެ ނާދެވި މައްކާގައި ތާށިވީ އެ މީހުން އުމްރާއަށް ދިއުމަށް ދެއްކި ފައިސާ އެ ގުރޫޕުގެ އެހެން ކަމަކަށް ބޭނުން ކުރުމާ ގުޅިގެން ރިޓާން ޓިކެޓު ނުނެގިގެންނެވެ.

އެހެންވެ، ހާލުގައި ޖެހުނު މީހުން، ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް މިހާރު ވަނީ ބަދަލު ކޮށްފަ އެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް އަލީ ސައީދު ވިދާޅުވެފައިވަނީ ހާލުގައި ޖެހުނު އުމްރާވެރިން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް މިހާރު ބަދަލުކޮށްފައިވާ ކަމަށާއި އަދި ގަތަރު އެއާވޭސްގައި އެ މީހުން ރާއްޖެ ގެެނެވޭނީ އަންނަ ހޮނިހިރު ދުވަހުގެ ހެނދުނު 8:10 ގައި ކަމަށެވެ.

މި މައްސަލައިގައި އިސްލާމިކް މިނިސްޓްރީން އެކުންފުނި ވަނީ 100,000 ރުފިޔާއިން ޖޫރިމަނާ ކޮށްފަ އެވެ. އަދި އެ ކުންފުނީގެ މައްޗަށް ގާނޫނީ ފިޔަވަޅު ތަކެއް އަޅާފައިވެ އެވެ.

އަލްހިޖްރަ ގުރޫޕާ ދެކޮޅަށް އަޅާފައިވާ ފިޔަވަޅުތަކަކީ،

• ދިވެހިރާއްޖެއިން އުމްރާއަށް މީހުން ގެންދިއުމަށް މިނިސްޓްރީން، ހިޖްރަ ގުރޫޕަށް ދޫކޮށްފައިވާ ހުއްދަ ހިފެހެއްޓުން.

• ހިޖުރަ ގުރޫޕުގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިޔުމުގެ ހުއްދަނުދިނުން.

• ހިޖުރަ ގުރޫލުގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް މިނިސްޓްރީން ކުރި ޚަރަދު އެ ކުންފިން ހޯދުން.

• ހިޖުރަ ގުރޫޕުގެ ފަރާތުން އުސޫލާ ހިލާފުވެފައިވާތީ އެ މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ފުލުހުންނަށް ހުށަހެޅުން.