އުމްރާވެރީންނަށް އިހުމާލުވި ގުރޫޕު 100،000 ރުފިޔާއިން ޖޫރިމަނާކޮށް، މައްސަލަ ފުލުހަށް

އުމްރާވެރިންނަށް އިހުމާލުވި މައްސަލާގައި އަލް-ހިޖުރަ ޓްރެވަލް އެންޑް ޓުއާސްގެ ވެރިންނަށް ގާނޫނީ ފިޔަވަޅު އަޅައި އެ ކުންފުނި 100،000 ރުފިޔާއިން ޖޫރިމަނާ ކުރަން އިސްލާމިކް މިނިސްޓްރީން މިއަދު ނިންމައިފި އެވެ.

މިގޮތަށް ނިންމާފައިވަނީ މިދިޔަ މަހު އަލް-ހިޖުރަ ޓްރެވަލް އެންޑް ޓުއާސްގެ ފަރާތުން އުމްރާއަށް މައްކާއަށް ގެންދިޔަ އުމްރާވެރިން ދަތުރަށް ފައިސާ ދައްކާފައި ވިޔަސް، އެ ފައިސާއިން އުމްރާވެރިންގެ ދެކޮޅު ޓިކެޓު ހަމަނުޖައްސާ ހުރުމުގެ ސަބަބުން އުމްރާވެރިން މައްކާގައި ތާށިވެފައިވާތީއެވެ.

އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ އުމްރާވެރިން ދެއްކި ފައިސާ ކުންފުނީގެ އެހެން ކަންކަމަށް ބޭނުންކޮށްފައިވާ ކަމަށް އަލް-ހިޖުރަ ކުންފުނީގެ ވެރިން އިއުތިރާފުވެފައިވާ ކަމަށެވެ. މީގެ އިތުރުން، ރާއްޖެއިން އުމްރާއަށް މީހުން ގެންދިއުމާ ބެހޭ އުސޫލާ އަލް-ހިޖުރަ ގްރޫޕުން ހިލާފުވެފައިވާތީ، އެ ކުންފުންޏަށް އަދި ކުންފުނީގެ ހިއްސާދާރުންނަށް ފިޔަވަޅު އަޅަން ނިންމާފައިވާ ކަމަށް ވެސް މިނިސްޓްރީން ބުނެފައިވެއެވެ.

މި މައްސަލާގައި އިސްލާމިކް މިނިސްޓްރީން އަޅަން ނިންމާފައިވާ ފިޔަވަޅުތަކުގެ ތެރޭގައި، އުމްރާއަށް މީހުން ގެންދިއުމަށް އެ ކުންފުންޏަށް ދޫކޮށްފައިވާ ހުއްދަ ހިފެހެއްޓުމާއި، ކުންފުނި 100،000 ރުފިޔާއިން ޖޫރިމަނާކުރުން ހިމެނެއެވެ. އަދި އަލް-ހިޖުރަ ޓްރެވަލް އެންޑް ޓުއާސްއަށް އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާއަށް މީހުން ގެންދިއުމުގެ ހުއްދަ ނުދިނުމަށް ވެސް ވަނީ ނިންމާފައެވެ.

މީގެ އިތުރުން، ކުންފުނީގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް އިސްލާމިކް މިނިސްޓްރީން ކުރި ހަރަދު އެ ކުންފުނިން ހޯދުމަށާއި، އުމްރާއަށް މީހުން ގެންދިއުމުގެ އުސޫލާ އަލް-ހިޖުރަ ކުންފުނިން ހިލާފުވެފައިވާތީ މައްސަލަ ތަހުގީގުކޮށް، ގާނޫނީ ފިޔަވަޅު އަޅަން ފުލުހަށް ހުށަހެޅުމަށް ވެސް އިސްލާމިކް މިނިސްޓްރީން ވަނީ ނިންމާފައެވެ.

މި މައްސަލައިގައި ތާށިވެފައިވާ 23 އުމްރާވެރިންނާ މިހާރު މައްކާގައި ތިބި ހައްޖު ކޯޕަރޭޝަނުގެ ޓީމުން ވަނީ ހަވާލުވެފައެވެ. އަދި އެ އުމްރާވެރިން ރާއްޖެ ގެނައުމުގެ މަސައްކަތް ސަރުކާރުން ވަނީ ފަށާފައެވެ.