ރޯދަ މަހުގެ ކުރިން ފުލެޓު ލިސްޓު އާންމު ކުރެވޭނެ ކަމަށް އުންމީދު ކުރަން: ރައީސް

ކުރިއަށް އޮތް ރޯދަ މަހުގެ ކުރިން ފްލެޓު ލިބޭ ފަރާތްތަކުގެ ލިސްޓު އާންމުކުރެވޭނެ ކަމަށް އުންމީދުކުރައްވާ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ހުވަދު އަތޮޅުގެ ބައެއް ރަށްތަކަށް ކުރެއްވި ދަތުރުފުޅު ނިންމަވާލައްވައި މާލެ އެނބުރި ވަޑައިގަތުމުގެ ކުރިން ނޫސްވެރިންނާ ވާހަކަފުޅު ދައްކަވަމުންނެވެ.

ރައީސް ވިދާޅުވީ ވައުދުވެވަޑައިގެންނެވި ގޮތަށް ގޯއްޗާއި ފްލެޓު ދޫކުރުމުގެ މަސައްކަތް މިހާރު ފަށާފައިވާ ކަމަށެވެ. ނަމަވެސް މަކަރާއި ހީލަތުން ނުވަތަ ދޮގު ލިޔެކިޔުންތަކުގެ ޒަރީއާއިން ފްލެޓު ނުވަތަ ގޯތި ހޯދާފައިވާ ފަރާތްތަކުގެ މައްސަލަތައް ބަލައި، އެފަދަ ފަރާތްތަކަށް ދީފައިވާ ފްލެޓު ނުވަތަ ގޯތި ކެންސަލްކުރެވޭނެ ކަމަށް ރައީސް ވިދާޅުވިއެވެ.

"މައިގަނޑު އަމާޒަކީ އެ މީހަކަށް ފްލެޓު ލިބުނު ތަނަކުން ނޫނީ ގޯތި ލިބުނު ތަނަކުން ވިއްޔާ ދިނުން. އެކަމަކު ގޯސްތަކެއް ހަދާފައި ހުރި ބައެއްގެ މައްސަލައެއް ވިއްޔާ އެ މައްސަލައެއް ބެލިގެން ދާނެ," ރައީސް ވިދާޅުވިއެވެ.

ރައީސް އުންމީދު ކުރައްވާ ގޮތުގައި ވީހާވެސް އަވަހަކަށް 4,000 ފްލެޓުގެ ކަންތައް ނިންމައި އިޢުލާނުކުރެވޭނެއެވެ. އަދި ރޯދަ މަހުގެ ކުރިން ފްލެޓު ލިސްޓު އިޢުލާނުކުރުމަށް މަސައްކަތްކުރަމުންދާ ކަމަށާއި، އެކަން އެގޮތަށް ކުރެވޭނެ ކަމަށް ގަބޫލުކުރައްވާ ކަމަށްވެސް ރައީސް ވިދާޅުވިއެވެ.

ފާހަގަކޮށްލެވޭ ކަމަކީ، ކުރީގެ ސަރުކާރުން ހިންގި 'ގެދޮރުވެރިޔާ' ސްކީމުގެ ދަށުން ފްލެޓު ލިބޭ ފަރާތްތަކުގެ ލިސްޓު އާންމުކުރުން ލަސްވަމުންދާ ކަމެވެ. މިކަމާ ގުޅިގެން ފުލުހުންނާއި އޭސީސީން ތަޙުޤީޤެއް ކުރިއަށްގެންދާ ކަމަށް ވެސް ރައީސް ވަނީ ކުރިން ވިދާޅުވެފައެވެ.