ހިޔާވެހި ފައިނޭންސް ސްކީމަކީ ރައްޔިތުންނަށް ލިބިފައި އޮތް ރަނުގެ ފުރުސަތެއް: ރައީސް

ގެދޮރުވެރިކަމާއި ބޯހިޔާވަހިކަން ކަށަވަރުކުރުމަށް ހިޔާވެހި ފައިނޭންސް ސްކީމަކީ ރައްޔިތުންނަށް ލިބިފައި އޮތް ރަނުގެ ފުރުސަތެއް ކަމަށާ، ހުރިހާ ރައްޔިތުންވެސް މި ފުރުސަތުގެ ބޭނުން ހިފުމަށް ރައީސް ޑރ. މުޙައްމަދު މުޢިއްޒު އިލްތިމާސް ކުރައްވައިފި އެވެ.

ރައީސްގެ މި އިލްތިމާސް ތަކުރާރު ކުރައްވާފައި ވަނީ، ހުވަދު އަތޮޅަށް ކުރައްވާ ފަތުރުފުޅުގެ ތެރެއިން ގއ. މާމެންދޫއަށް ވަޑައިގެން މި ރަށުގެ ރައްޔިތުންނާ ބައްދަލު ކުރެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ސަރުކާރުގެ އެންމެ އިސް ސިޔާސަތަކީ ގެދޮރުގެ ދަތިކަމުގެ މައްސަލައަށްެ ދާއިމީ ހައްލެއް ހޯދުންކަން ތަކުރާރުކޮށް ފާހަގަ ކުރައްވަމުން ރައީސް ވަނީ، ދިވެހީންގެ ރާއްޖެ މެނިފެސްޓޯގައި ވެސް ހިމަނާފައިވާ ފަދައިން، މި ޕްރޮގްރާމުގެ ދަށުން، ރާއްޖޭގެ ކޮންމެ ރަށެއްގައި ހުރި މީހަކު ކަމުގައިވިޔަސް، އެމީހެއްގެ އަމިއްލަ ގޯތި، އުޅެވޭ ވަރުގެ ހިޔާވައްސަކަށް ހެދޭނެކަމުގެ އުންމީދު ދެއްވާފަ އެވެ.

ރައްޔިތުންނަށް އެންމެ ބޮޑުވެފައިވާ މައްސަލައަކީ ބޯހިޔާވަހިކަމުގެ ދަތިކަން ކަމުގައި ވާ ހިނދު، މި މައްސަލައަށް ހައްލެއް ލިބެން އޮތް ދެވަނަ ގޮތަކީ ހައުސިންގް މަޝްރޫއުތައް ހިންގުން ކަމުގައި ރައީސް ވިދާޅުވި އެވެ.

މި މަޝްރޫއުތައް މިއަހަރުގެ ތެރޭގައި ފެށުމަށް ދައުލަތުގެ ބަޖެޓުގައި 1.5 ބިލިއަން ރުފިޔާ ހިމަނާފައި އޮތްކަން ރައީސް ފާހަގަކުރެއްވި އެވެ.

މިއީ ކުރިއަށް އޮތް އަހަރުތަކުގައި ވެސް ބަޖެޓަށް އިތުރު ކުރެވޭނެ މިންވަރެއް ކަމަށާ، މަގުސަދަކީ ގެދޮރުގެ ދަތިކަމުގެ މައްސަލައަށް، ހަގީގީ މާނައިގައި ދާއިމީ ހައްލެއް ހޯދައިދިނުން ކަމުގައި ރައީސް ވިދާޅުވި އެވެ.

ރައީސްގެ ވާހަކަފުޅުގައި ހިނގަމުން މިދާ ރިޔާސީ ދައުރު ނިމޭއިރު، ދިވެހި ކޮންމެ ރައްޔިތަކީ ގެދޮރުގެ މައްސަލައަށް ދާއިމީ ހައްލެއްގެ ފުރުސަތު އޮތް މީހަކަށް ވުމަކީ އަމާޒުކަމުގައި ފާހަގަކުރެއްވި އެވެ.

ހައުސިންގް ޔުނިޓް ނުވަތަ ލޯނު ސްކީމާއި އެނޫންވެސް އެފަދަ މަޝްރޫއުތަކުގެ ތެރެއިން ކޮންމެ މީހަކީ ވެސް އެމީހެއްގެ ފުރަތަމަ ބޯހިޔާވައްސަށް ފުރުސަތު ލިބިފައި އޮތް ރައްޔިތެއް ކަމުގައި ހެދުމަށް ވީ ވައަދު ފުއްދަވަމުން ގެންދަވާނެ ކަމަށްވެސް ރައީސް ވަނީ ވިދާޅުވެފަ އެވެ.

ގެދޮރުވެރިކަމުގެ މައްސަލައަށް ހައްލެއް ގެނައުމަށްޓަކައި ފަސް އިންސައްތައަށްވުރެ އިންޓަރެސްޓް ރޭޓު ބޮޑުނުވާ ގޮތަށް ދޫކުރާ ގެދޮރުވެރިކަމުގެ ލޯނުތައް ދޫކުރަން ފަށްޓާނެކަން ރައީސް އިއުލާން ކުރެއްވީ ނިމިދިޔަ އަހަރުގެ މިނިވަންދުވަހު ގައުމާ މުހާތަބު ކުރައްވައި ވާހަކަފުޅު ދައްކަވަމުންނެވެ.

"ހިޔާވެހި ފައިނޭންސިންގް ޕްރޮގްރާމް" އިފްތިތާހުކޮށްދެއްވީ، ހަމަ އެ އަހަރުގެ ނޮވެމްބަރު މަހުގެ ތެރޭގަ އެވެ.