މަގުތަކުގައި ފެންބޮޑުވެ ލިބުނު ގެއްލުން 2.2 މިލިއަން ރުފިޔާއަށް އަރައިފި

މިދިޔަ ހުކުރު ދުވަހު މާލެއަށް ކުރި ވިއްސާރައިގައި ފެންބޮޑުވެ، މީހުން ދިރިއުޅޭ ގެތަކަށް ލިބުނު ގެއްލުން 2.2 މިލިއަން ރުފިޔާއަށް އަރާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އަތޮޅުތެރޭގެ ރަށްތަކުގައި މީހުން ދިރިއުޅޭ ތަންތަނަށް ލިބުނު ގެއްލުން އަށް ލައްކައަށް އަރާ ކަމަށްވެސް އެ އޮތޯރިޓީން ހާމަކޮށްފައިވެއެވެ.

24 ގަޑިއިރު ތެރޭގައި 161.9 މިލިމީޓަރުގެ ވާރޭ ވެހުނު ކަމަށް އެންޑީއެމްއޭއިން ބުނެފައިވެއެވެ. މިއީ މާލެއަށް އެހާ ބޯކޮށް ވާރޭ ވެހުނު ރެކޯޑު އަދަދެކެވެ. ހަމައެހެންމެ، ތިން ގަޑިއިރު ތެރޭގައި 109.8 މިލިމީޓަރުގެ ވާރޭ ވެހުނު ކަމަށްވެސް އެންޑީއެމްއޭ ބުނެފައިވެއެވެ.

މާލޭގައި ފެންބޮޑުވުމުގެ ހާދިސާއަށް އިޖާބަދިނުމުގެ ގޮތުން އެންޑީއެމްއޭއިން ވަނީ މާލޭ ސިޓީ ކައުންސިލަށް 20,000 ގޯނި، ވެލިބަސްތާ ޖެހުމަށް ފޯރުކޮށްދީފައެވެ. އެހީތެރިކަމަށް އެދި 740 ތަނަކުން ރިޕޯޓުކުރިކަމަށްވެސް އެ އިދާރާއިން ބުނެފައިވެއެވެ.

އެ އިދާރާއިން އިތުރަށް ބުނެފައިވާ ގޮތުގައި ވިއްސާރައިގެ ސަބަބުން 27 ގޭބީސީގެ 226 މީހުންނަށް ވަގުތީ ބޯހިޔާވަހިކަމާއި ކެއިންބުއިން ފޯރުކޮށްދީފައިވެއެވެ. އަދި 115 ގެއެއްގެ އެސެސްމަންޓް ހަދާފައިވާ ކަމަށް އެންޑީއެމްއޭއިން ބުނެފައިވެއެވެ.

އަތޮޅުތެރެއިން ދެ ރަށަކަށް އުދަ އަރައިގެން ރިޕޯޓުކުރި ކަމަށާއި، އަށް ރަށަކުން ފެންބޮޑުވުމުގެ ސަބަބުން ރިޕޯޓުކުރި ކަމަށް އެންޑީއެމްއޭއިން ބުނެފައިވެއެވެ. މިއީ މާލެއަށް ބޯކޮށް ވާރޭ ވެހިގެން މިހާތަނަށް ހިންގުނު އެންމެ ބޮޑު އޮޕަރޭޝަން ކަމަށާއި، އެންމެ ބޮޑަށް ގެއްލުންވެ، އެންމެ ގިނައިން މީހުން ރައްކާތެރި ތަންތަނަށް ބަދަލުކުރަންޖެހުނު ފަހަރު ކަމަށްވެސް އެ އޮތޯރިޓީން ބުނެފައިވެއެވެ.