ޓޮޓެންހަމުން ލިވަޕޫލް ބަލިކޮށް ލީގު ކަޕް ފައިނަލަށް ދިއުމުގެ ފުރުސަތު ބޮޑު ކޮށްފި

ސްވިޑެންގެ 19 އަހަރުގެ މިޑްފީލްޑަރު ލޫކަސް ބާގްވާލް

އިނގިރޭސި ލީގު ކަޕް ސެމީ ފައިނަލުގެ ފުރަތަމަ ލެގުގައި ޓޮޓެންހަމް ހޮޓްސްޕާސްއިން ލިވަޕޫލް 1-0 އިން ބަލިކޮށް، ފައިނަލަށް ދިއުމުގެ ފުރުސަތު ބޮޑުކޮށްފިއެވެ.

ޓޮޓެންހަމްގެ އަމިއްލަ ދަނޑުގައި ރޭ ކުޅެވުނު މެޗުގެ ހަމައެކަނި ލަނޑު ޖެހީ 86 ވަނަ މިނެޓުގައި ސްވިޑެންގެ 19 އަހަރުގެ މިޑްފީލްޑަރު ލޫކަސް ބާގްވާލްއެވެ. ނަމަވެސް މި ލަނޑު ޖެހުމުގެ ކުޑައިރުކޮޅެއް ކުރިން ބާގްވާލް ވަނީ ލިވަޕޫލްގެ ކުޅުންތެރިއަކަށް ފައުލެއް ކޮށްފައެވެ. މިކަމާ ގުޅިގެން ލިވަޕޫލުން ވަނީ ވަރަށް ބޮޑަށް ނުރުހުން ފާޅުކޮށްފައެވެ.

މެޗުގެ ކުރީކޮޅު ޓޮޓެންހަމްގެ ރޮޑްރީގޯ ބެންޓަންކޫރަށް ސީރިއަސް އަނިޔާއެއްވެ، ސްޓްރެޗަރުގައި ހޮސްޕިޓަލަށް ގެންދަން ޖެހުނެވެ. ނަމަވެސް ޓޮޓެންހަމްއިން ބުނެފައިވަނީ އޭނާގެ ހާލު ރަނގަޅުވަމުން އަންނަ ކަމަށެވެ.

ލިވަޕޫލުން ވެސް މެޗުގައި ވަރުގަދަ ކުޅުމެއް ދެއްކި ނަމަވެސް، ލިބުނު ފުރުސަތުތަކުގައި ގޯލެއް ޖެހޭގޮތް ނުވިއެވެ. ރޭގެ މެޗުގައި ޓޮޓެންހަމްގެ ގޯލް ބެލެހެއްޓި އެޓީމަށް އަލަށް ގެނައި ގޯލްކީޕަރު އެންޓޮނިން ކިންސްކީ ވަނީ ރަނގަޅު ކުޅުމެއް ދައްކާފައެވެ.

ލީގު ކަޕްގެ ސެމީ ފައިނަލްގެ ދެވަނަ ލެގު އޮންނާނީ އަންނަ މަހުގެ ހަވަނަ ދުވަހު ލިވަޕޫލްގެ ދަނޑުގައެވެ. މި ނަތީޖާއާއެކު ޓޮޓެންހަމްއަށް ފައިނަލަށް ދިއުމުގެ ފުރުސަތު ބޮޑުވެފައިވާއިރު، ލިވަޕޫލަށް ދެވަނަ ލެގުގައި ވަރަށް ބޮޑު މަސައްކަތެއް ކުރަން ޖެހޭނެކަން ފާހަގަކުރެވެއެވެ.

އިނގިރޭސި ލީގު ކަޕް