އަސީރުން ދޫކޮށްލާނީ ޔަހޫދީން ހަނގުރާމަ ހުއްޓައިލުމުން: ޙަމާސް

އަސީރުން މިނިވަން ކުރާނީ ޔަހޫދީން ހަނގުރާމަ ހުއްޓައިލުމަށް އެއްބަސްވުމުން ކަމަށް ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތުން އަނެއްކާވެސް ބުނެފިއެވެ.

ހަމާސް އިން މިފަދައިން ބުނެފައި މިވަނީ ޣައްޒާގައި ކުރަމުންދާ ހަނގުރާމަ ހުއްޓުވުމަށް ޤަޠަރާއި މިޞްރުން މަސައްކަތްކުރަމުންދާ ދަނޑިވަޅެއްގައެވެ.

ޙަމާސްގެ އިސް ވެރިއެއް ކަމަށްވާ އުސާމާ ޙަމްދާން ބުނެފައިވަނީ ޙަމަލާ ބަދަލުކުރުން ހުއްޓައިލުމުގެ އެއްބަސްވުމަކާ ހަމައަށް އާދެވިފައި ނުވަނީ ޔަހޫދީ ދައުލަތުގެ ސަބަބުން ކަމަށެވެ. ޙަމާސުން ޝަރުތުކުރަނީ ޣައްޒާއަށް ދެމުންދާ ލާއިންސާނީ އަނިޔާތަކަށް ފުރިހަމަ ނިމުމެއް ގެނެސް، ޔަހޫދީން އިސްތިޢުމާރު ކޮށްފައިވާ ބިންތަކުން ފޭބުމަށެވެ.

ޙަމާސުން ހަނގުރާމަ ހުއްޓައިލަން ބޭނުންވާކަން ޔަޤީން ކޮށްދިނުމަށް، ޢުދުވާން ހުއްޓުމަކަށް ގެނައުމާ އެކު ވަގުތުން ދޫކޮށްލާނެ 34 އަސީރެއްގެ ނަން ޒަޔަނިސްޓު ސަރުކާރާ ޙިއްޞާ ކޮށްފައިވެއެވެ. ނަމަވެސް މަޝްވަރާތަކުގައި ޔަހޫދީ ދައުލަތުން ދައްކާ ވާހަކައިން ހަނގުރާމަ ހުއްޓައިލުމަށް އެއްވެސް ޝައުޤުވެރިކަމެއް ނެތްކަން ހާމަވެއެވެ.

ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި މިހާތަނަށް 45,805 މީހުން ޝަހީދުވެފައިވާއިރު، އޭގެ ތެރޭގައި 17,000 އަށްވުރެ ގިނަ ކުޑަކުދިން ހިމެނެއެވެ. އަދި 108,583 މީހުން ޒަޚަމުވެފައިވާ ކަމަށް ވަނީ ރިޕޯޓުކޮށްފައެވެ.

މަޝްވަރާތައް ކުރިއަށްދާއިރުވެސް ޔަހޫދީން ދަނީ ޣައްޒާގެ ޢާންމު ރައްޔިތުންނަށް އަމާޒުކޮށް ދެމުންދާ ނިރުބަވެރި ޙަމަލާތައް އިތުރުކޮށް ފުޅާކުރަމުންނެވެ. މި ހާލަތުގައި ޣައްޒާގެ ޞިއްޙީ ވުޒާރާއިން ވަނީ ޢާންމުންނަށް ބޭނުންވާ ޞިއްޙީ ފަރުވާ ދިނުމަށް ޖަނަރޭޓަރުތައް ހިންގަން ބޭނުންވާ ތެޔޮ އަވަހަށް ފޯރުކޮށްދިނުމަށް ބައިނަލްއަޤްވާމީ އެހީއަށް އެދިފައެވެ.