ސިއްހީ ދާއިރާގެ ކުރިއެރުމަށް މެޑަމް ސާޖިދާ ކުރައްވާ މަސައްކަތަށް ތައުރީފު!

ރާއްޖޭގެ ސިއްހީ ދާއިރާގެ ކުރިއެރުމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު ކުރައްވަމުން ގެންދަވާ މަސައްކަތަށް ވެސްޓާން އޮސްޓްރޭލިއާގެ ގަވަރުނަރުގެ އަނބިކަނބަލުން ޑެރިލީން ޖޫލީ ޑޯސަން ތައުރީފު ކުރައްވައިފި އެވެ.

ޑެރިލީން ޖޫލީ ވަނީ މެޑަމް ސާޖިދާގެ އަރިހަށް އިހުތިރާމްގެ ޒިޔާރަތެއް މިއަދު ކުރައްވައިފަ އެވެ.

މި ބައްދަލުކުރެއްވުމުގައި ޖޫލީއަށް މަރުހަބާ ވިދާޅުވެ ގަވަރުނަރު ޑޯސަންއާއި އެ ކަމަނާ ރާއްޖޭގައި ހޭދަ ކުރައްވާ ވަގުތަކީ އުފާވެރި ވަގުތަކަށްވުމަށް ސާޖިދާ އެދިވަޑައިގެންނެވި އެވެ.

އެ ކަމަނާ ވަނީ ރާއްޖެއާއި އޮސްޓްރޭލިއާ އާއި ދެމެދު އޮތް ގާތް ގުޅުމަށް ޓަކައި ޝުކުރު އަދާ ކުރައްވާފަ އެވެ.

މެޑަމް ސާޖިދާ އަދި ޑެރިލީން ޖޫލީ ދެއްކެވި ވާހަކަފުޅުގައި، ިރާއްޖެއާއި އޮސްޓްރޭލިއާއިން ތައުލީމީ ދާއިރާގެ ތަރައްގީއަށް ޒަމާނުއްސުރެ ކުރަމުން ގެންދާ މަސައްކަތާއި، ހާއްސަ ގޮތެއްގައި ކުޑަކުދިންނާއި އަންހެން ކުދިންނަށް އުނގެނުމުގެ ފުރުސަތުތައް ފަހިކޮށްދިނުމަށާއި، ވަށާޖެހޭ ތައުލީމުގެ މުހިންމުކަމާ ބެހޭގޮތުން މަޝްވަރާކުރައްވާފައިވެއެވެ.

އޭގެ އިތުރުން ރާއްޖެއިން އޮސްޓްރޭލިއާއަށް މަތީ ތައުލީމު ހާސިލު ކުރަން ދާ ކުދިންގެ ނިސްބަތް އިތުރުވަމުން ދިއުމާއި އޮސްޓްރޭލިއާ އެވޯޑްސް ސްކޮލަޝިޕާ ބެހޭގޮތުން މަޝްވަރާކުރެއްވި އެވެ.

ގަވަރުނަރުގެ އަނބިކަނބަލުން ވަނީ ރައީސުލްޖުމްހޫރިއްޔާގެ އަނބިކަނބަލުންގެ ހައިސިއްޔަތުން މެޑަމް ސާޖިދާ މުޙައްމަދު އަދާކުރައްވާ ދައުރު ފާހަގަކުރައްވާފަ އެވެ. އަދިސިއްހީ ދާއިރާގެ ކުރިއެރުމަށް އެ ކަމަނާ ކުރައްވަމުން ގެންދަވާ މަސައްކަތްޕުޅުތަކަށް ވެސް ތައުރީފު ކުރައްވާފަ އެވެ.

މި ބައްދަލުކުރެއްވުން ނިންމަވާލައްވާފައިވަނީ ދެ ގައުމުގެ މެދުގައި އޮތް ގުޅުން އިތުރަށް ބަދަހިވެގެންދާނެކަމުގެ ޔަގީންކަން ދެއްވަމުންނެވެ.