ގުލާގެ ދެ ގޯލާއެކު ރެއާލް މެޑްރިޑް ސްޕެނިޝް ކަޕްގެ ގަދަ 16 އަށް

ޒުވާން ހުނަރުވެރި ފޯވާޑު އާޑާ ގުލާ

ޒުވާން ހުނަރުވެރި ފޯވާޑު އާޑާ ގުލާގެ ދެ ގޯލާއި އެކު މޮޅުވެ، ރެއާލް މެޑްރިޑުން ސްޕެނިޝް ކަޕް (ކޮޕަ ޑެލް ރޭ)ގެ ގަދަ 16 އިން ޖާގަ ހޯދައިފިއެވެ.

އެޓީމު މޮޅުވެފައި ވަނީ ހަތަރު ވަނަ ޑިވިޝަނުގެ ޑިޕޯޓިވާ މިނޭރާއާ ދެކޮޅަށް ކުޅެ 5-0 ގެ ތަފާތު ބޮޑު ނަތީޖާއަކުންނެވެ.

ރެއާލުން މި މެޗުގައި ކުޅުނީ ޓީމުގެ ބައެއް މުހިންމު ކުޅުންތެރިން ނުލައެވެ. އޭގެ ތެރޭގައި ޖޫޑް ބެލިންހަމްވެސް ހިމެނެއެވެ. ކޯޗު ކާލޯ އަންޗެލޮޓީ ވަނީ އާންމުކޮށް މެޗުތަކުގައި ފުރުސަތު ނުލިބި ތިބި ގިނަ ކުޅުންތެރިންނަށް ފުރުސަތު ދީފައެވެ.

ގުލާގެ އިތުރުން ރެއާލްގެ ލަނޑުތައް ޖެހީ ފެޑެރީކޯ ވަލްވޭޑޭ، އެޑުއާޑޯ ކަމަވިންގާ އަދި ލޫކަ މޮޑްރިޗްއެވެ. މިއީ މި ސީޒަނުގައި ގުލާގެ ފަރާތުން އެންމެ ރަނގަޅު ކުޅުމެއް ފެނިގެންދިޔަ މެޗެވެ.

ރެއާލް މެޑްރިޑުން ވަނީ 20 ފަހަރު ސްޕެނިޝް ކަޕްގެ ޗެމްޕިއަންކަން ހޯދާފައެވެ. އެންމެ ފަހުން މި މުބާރާތުގެ ތަށި އުފުލާލީ 2023 ވަނަ އަހަރުއެވެ. މިދިޔަ ސީޒަނުގައި ރެއާލް މި މުބާރާތުން ކެޓީ އެތުލެޓިކޯ މެޑްރިޑް އަތުންނެވެ. އެއީ މި މުބާރާތުގެ ގަދަ 16 ބުރުގައެވެ.

ރިއަލް މެޑްރިޑް