އޮކްޓޯބަރު މަސް ތެރޭ ވައިޑްބޮޑީގެ ދެވަނަ ބޯޓު އުދުހެން ފަށާނެ: ރައީސް

މި އަހަރުގެ އޮކްޓޯބަރު މަހުގެ ތެރޭގައި ދެވަނަ، ވައިޑް-ބޮޑީ މަތިންދާބޯޓު ރާއްޖޭގައި އުދުހެންފަށާނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ.

މޯލްޑިވިއަނުން ގެންނަ ފުރަތަމަ ވައިޑް-ބޮޑީ އޭ330 މަތިންދާބޯޓު މިއަދު ވަނީ ރާއްޖެ ގެެނެސްފަ އެވެ. މި ބޯޓު ރާއްޖެ ގެނައުން ފާހަގަ ކުރުމަށް މޯލްޑިވިއަނުން މިއަދު ވަނީ އެއާ ޝޯއެއް ބާއްވާފަ އެވެ.

ވައިޑް-ބޮޑީ އެއާކްރާފްޓް އޮޕަރޭޝަން އަދި އެއާބަސް އޭ330-200، އިފްތިތާހުކުރުމަށް މިއަދު ބޭއްވި ހަފުލާގައި ވާހަކަފުޅުދައްކަވަމުން ރައީސް ޑރ. މުޙައްމަދު މުއިއްޒު ވިދާޅުވީ ފިނޭންސް މިނިސްޓްރީއާ އައިލެންޑް އޭވިއޭޝަން އަދި ޓްރާންސްޕޯޓް މިނިސްޓްރީން ކުރިއަށް ގެންދާ މަސައްކަތްތައް ނިމި، އޮކްޓޯބަރު މަހު ދެވަނަ ބޯޓު ރާއްޖޭގައި އުދުހުމަށް ފަށާނޭ ކަމަށެވެ.

"މީގެ ދެވަނަ ބޯޓު މި އަހަރުގެ އޮކްޓޯބަރު މަސް ތެރޭ ރާއްޖޭގައި އުދުހެން ފަށާނެ. އެކަމުގެ ޔަގީންކަން އަރުވަން،" އެ މަނިކުފާނު ވިދާޅުވިއެވެ.

ރައީސް ވިދާޅުވީ މި އޮޕަރޭޝަންތައް ފެށުމާއެކު، މޯލްޑިވިއަނުން ދަތުރުކުރާ މަންޒިލްތައް އިތުރުވުމުން ލިބޭ ކުރިއެރުމަކީ، ދިވެހި އިގުތިސާދު ފުޅާކުރުމަށް ޓަކައި ފަށްޓަވާފައިވާ މަސައްކަތަށް ލިބޭ ވަރަށް ބޮޑު ކުރިއެރުމެއް ކަމަށެވެ.

އެމަނިކުފާނު ވިދާޅުވީ މި އަހަރު ވެގެންދާނީ، ކުޑަ ދުވަސްކޮޅެއްގެ ތެރޭގައި ވަރަށް ގިނަ ހަރުފަތްތަކެއް ގިރާކޮށްގެން، އައިލެންޑް އޭވިއޭޝަނާއި އެމްއޭސީއެލް އަށް އިތުރު ކުރިއެރުންތަކެއް ގެނެސްދޭނޭ އަހަރަކަށް ކަމުގަ އެވެ.

ކުރިއަށް މި އޮތީ ތަރައްގީގެ ދުވަސްތައް ކަމަށާއި، މި އަހަރު ރައްޔިތުންނަށް ފެންނާނީ އިގުތިސާދީ، އިޖުތިމާއީ، އަދި އުމްރާނީ ގޮތުންވެސް ތަރައްގީގެ އަމަލީ މަންޒަރުތައް ކަމަށް އެމަނިކުފާނު ވިދާޅުވިއެވެ.

އަދި މި ސަރުކާރުން މަސައްކަތްކުރަނީ ތަރައްގީ އާއި ހަމަޖެހުމާއި މިނިވަންކަމާއި ސިޔާދަތު އެކުއެކީގައި ހާސިލުވެގެންދާ ފަދަ ވަށާޖެހޭ ތަރައްގީއެއް ގައުމަށް ގެނެސްދިނުމަށް ކަމަށް ވެސް ރައީސް ވިދާޅުވި އެވެ.

ރާއްޖެއަށް ވައިޑް-ބޮޑީ އެއާކްރާފްޓް އޮޕަރޭޝަން ތައާރަފްކުރެއްވުމަކީ ރައީސްގެ ރިޔާސީ ކެމްޕެއިންގެ ވައުދެކެވެ.