މޯލްޑިވިއަންގެ ފުރަތަމަ ވައިޑް ބޮޑީ މަތިންދާ ބޯޓު ރާއްޖެ ގެނެސްފި

މޯލްޑިވިއަނުން ގެނައި ބޯޓް ޖެއްސުން

ރާއްޖޭގެ ޤައުމީ އެއާލައިން މޯލްޑިވިއަންގެ ފުރަތަމަ ވައިޑް-ބޮޑީ އެއާކްރާފްޓް، އެއާބަސް އޭ330 މަތިންދާބޯޓު މިއަދު ރާއްޖެ ގެނެސްފިއެވެ. މިއީ ރައީސް ޑރ. މުޢިއްޒުގެ ރިޔާސީ ވަޢުދެއް ފުރިހަމަވެގެން ދިއުމެވެ.

މި ބޯޓު ސިންގަޕޫރުން މާލެ ގެނައީ މުޅިން ދިވެހި ޕައިލެޓުންނާއި ކްރޫއިންނެވެ. ވެލާނާ އިންޓަނޭޝަނަލް އެއާޕޯޓަށް ބޯޓު ޖެއްސުމުގެ ކުރިން އެއަރ ޝޯއެއް ބޭއްވިގެންދިޔައެވެ.

މިއަދު މި ގެނެވުނު އެއާބަސް އޭ330 ބޯޓަކީ 260 މީހުންގެ ޖާގައިގެ ބޯޓެކެވެ. މި ބޯޓުގައި ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާހުގައި ދަތުރުކުރެވޭނެއެވެ. އަދި 10 ޓަނުގެ ކާގޯ އުފުލޭނެއެވެ.

މި ބޯޓާއެކު ޗައިނާގެ ބެއިޖިން، ޝަންގްހާއި އަދި ޗެންގްޑޫއަށް ދަތުރުތައް ފެށުމަށް ވަނީ ހަމަޖެހިފައެވެ. މިހާރު މޯލްޑިވިއަންގެ ފްލީޓުގައި 25 ބޯޓު އޮތްއިރު، 29 މަންޒިލަކަށް ދަތުރުތައް ކުރަމުންދެއެވެ.

މޯލްޑިވިއަންގެ ޚިދުމަތް 2000 ވަނަ އަހަރު ފެށުނީ ދެ ބޯޓާއެކުގައެވެ. ވޭތުވެދިޔަ އަހަރު މޯލްޑިވިއަންއިން ވަނީ 50,000 ފްލައިޓް އޮޕަރޭޓްކޮށް، އެއް މިލިއަން ފަސިންޖަރުން އުފުލާފައެވެ. މި އައު ބޯޓާއެކު މޯލްޑިވިއަންގެ ޚިދުމަތް އިތުރަށް ފުޅާވެ، ދިގު ދަތުރުތަކަށް ޚާއްޞަ ބޯޓުތައް ލިބި، ސީދާ ދަތުރުތައް ފެށުމުގެ ފުރުޞަތު ލިބިގެންދާނެއެވެ.

މޯލްޑިވިއަން މޯލްޑިވިއަން އެއާރލައިންސް