ގުޅީފަޅުގެ މަގުތައް ހަދަން ޗައިނާގެ ކުންފުންޏަކާ ހަވާލުކޮށްފި

ގުޅިފަޅުގެ މަގުތައް ހެދުމާއި މުނިސިޕަލް އިމާރާތްތައް ހަދަން ޗައިނާގެ ޗައިނާ މެޝީނަރީ އިންޖިނިއަރިން ކޯޕަރޭޝަން (ސީއެމްއީސީ) ކުންފުންޏަކާ އެކު ސަރުކާރުން އެއްބަސްވުމެއްގައި މިއަދު ސޮއިކޮށްފި އެވެ.

ރައީސް އޮފީހުގައި މިއަދު ހެނދުނު ބޭއްވި ރަސްމިއްޔާތުގައި ސަރުކާރުގެ ފަރާތުން ސޮއި ކުރެއްވީ ހައުސިން އެންޑް އިންފްރާސްޓްރަކްޗާ ޑރ. އަބްދުﷲ މުއްތަލިބު އެވެ. އަދި ޗައިނާގެ ފަރާތުން ސޮއިކުރެއްވީ ޗައިނާ މެޝިނަރީ އިންޖިނިއަރިން ކޯޕަރޭޝަން އިން ރީޖަނަލް ޖެނެރަލް މެނޭޖަރު ކިއާން ހައޯޖޫން އެވެ.

މި ރަސްމިއްޔާތުގައި ވާހަކަފުޅު ދައްކަވަމުން މުއްތަލިބު ވިދާޅުވީ މިއަދު ސޮއި ކުރި މަޝްރޫއަކީ ރައީސް ޑރ. މުއިއްޒުގެ އިސްނެންގެވުމުގެ މަތިން މާލެ ސަރަހައްދުގައި ދިރިއުޅޭ ރައްޔިތުންނަށް ދިމާވެފައިވާ ތޮއްޖެހުމުގެ މައްސަލައަށް ހައްލު ހޯދުމަށް ކުރަމުންދާ މަސައްކަތް ތަކުގެ ތެރެއިން ކުރައްވާ މަސައްކަތެއް ކަމަށެވެ.

އަދި މި ސަރުކާރުން ރާއްޖޭގެ ހުރިހާ ސަރަހައްދެއްގެ ތަރައްގީއަށް އިސްކަން ދޭނެ ކަމަށް މިނިސްޓަރު ވިދާޅުވި އެވެ.

މި މަޝްރޫއުގެ ތެރެއިން ގުޅީ ފަޅުގެ އިލެކްޓްރިކްސިޓީ ޑިސްޓްރިބިއުޝަން ނެޓްވޯކް ގާއިމު ކުރުމާއި ފެނާއި ނަރުދަމާގެ ނިޒާމު މުޅި ގުޅިފަޅުގައި ގާއިމު ކުރުމާއި ޑިއު ވޯޓަރިން ސިސްޓަމް ގާއިމު ކުރުން ހިމެނެ އެވެ.

މީގެ އިތުރުން މަގުތައް ޒަމާނީ ފެންވަރަށް ހެދުމާއި ޖީޕޯން ޑަކްޓިން ސިސްޓަމާއި ގޭސް ސްޓޯރޭޖާއި ޑިސްޓްރިބިއުޝަން ސިސްޓަމް ގާއިމު ކުރާނެ އެވެ.

ރައީސް އޮފީހުން ބުނީ މި މަޝްރޫއަކީ ރައީސުލްޖުމްހޫރިއްޔާ ޗައިނާއަށް ކުރެއްވި ފުރަމާނަ ދަތުރުފުޅުގައި ރާއްޖެއާ ޗައިނާއާ ދެމެދު ވެފައިވާ އެއްބަސްވުމުގެ ދަށުން ކުރެއްވި ގިނަ މަސައްކަތް ތަކެއްގެ ނަތީޖާ ކަމަށެވެ.

ގުޅިފަޅުގެ މަގުތައް ހެދުމާއި މުނިސިޕަލް އިމާރާތްތައް ގާއިމު ކުރުމުގެ އެއްބަސްވުމުގައި ސޮއި ކުރުމުގެ ރަސްމިއްޔާތުގައި ރައީސް ޑރ. މުއިއްޒު ބައިވެރިވެވަޑައިގެންފި އެވެ.