އިންޑިއާގެ އާ ސަފީރު ރައީސް މުއިއްޒަށް ފަތްކޮޅު އަރުވައިފި

އިންޑިއާގެ އާ ސަފީރުގެ ފަތްކޮޅު އެރުވުން / ފޮޓޯ: ރައީސް އޮފީސް

އިންޑިއާއިން ރާއްޖެއަށް ކަނޑައެޅި އާ ސަފީރު ޖީ ބަލާސުބްރަމަނިއަން، ރައީސް މުހައްމަދު މުއިއްޒަށް އޭނާގެ ސަފީރުކަމުގެ ފަތްކޮޅު މިއަދު އަރުވައިފިއެވެ.

މި ރަސްމިއްޔާތު ބޭއްވުނީ މިއަދު ރައީސް އޮފީހުގައި އެކަމަށް ޚާއްޞަކޮށްގެން ބޭއްވި ރަސްމިއްޔާތެއްގައެވެ.

ބަލާސުބްރަމަނިއަން މި ރަސްމިއްޔާތަށް ޖުމްހޫރީ މައިދާނުން ރައީސް އޮފީހަށް ވަޑައިގެންނެވީ ރަތް ދޫލައިގައި އެމްއެންޑީއެފްއިން ދިން ސަގާފީ ހަރަކާތްތަކާ އެކުގައެވެ. މިއީ ބޭރުގެ އެހެން ސަފީރުންނަށް ވެސް އިހްތިރާމް ދިނުމުގެ ގޮތުން ފަތްކޮޅު އަރުވާއިރު ދޭ އިއްޒަތެކެވެ.

ފަތްކޮޅު އެރުވުމަށްފަހު، ރައީސް މުއިއްޒާއި ބަލާސުބްރަމަނިއަން ބައްދަލުކުރައްވައި ގުޅުން ބަދަހިކުރުމުގެ މަޝްވަރާތައް ކުރިއަށް ގެންގޮސްފައިވެއެވެ. މި ބައްދަލުވުމުގައި އާ ސަފީރު ވަނީ އިންޑިއާގެ ބޮޑުވަޒީރު ނަރެންދުރަ މޯދީ އާއި އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރުގެ ނަމުގައި ހެޔޮއެދުންތައް ރައްދުކުރައްވާފައެވެ.

ދެ ބޭފުޅުން ވަނީ ރާއްޖޭގައި އިންޑިއާއިން ހިންގަމުންގެންދާ ތަރައްޤީގެ މަޝްރޫޢުތަކާއި ކުރިއަށް އޮތް ތަނުގައި ވެސް އެއްބާރުލުން ދެވޭނެ ތަރައްޤީގެ ކަންކަން އަދި ގުޅުން ބަދަހި ކުރެވިދާނެ ދާއިރާތަކާ ގުޅޭ ގޮތުން މަޝްވަރާ ކުރައްވާފައެވެ. އަދި ބައްދަލުވުން ނިންމާލާފައިވަނީ، ދެ ޤައުމުގެ ގުޅުން ވަރުގަދަކަންމަތީ ދެމިއޮންނާނެ ކަމުގެ ކަށަވަރުކަން ދެ ބޭފުޅުންގެ ފަރާތުން ވެސް ދެއްވަމުންނެވެ.

ރާއްޖެ އިންޑިޔާ ރައީސް ޑރ މުޙައްމަދު މުޢިއްޒު