ލިވަޕޫލަށް ލީޑު ފުޅާ ކުރަން ލިބުނު ފުރުސަތު ގެއްލި ޕޮއިންޓަކުން ފުއްދާލަން ޖެހިއްޖެ

އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑާ 2-2 އިން އެއްވަރުވެ، ލީގުގެ އެއް ވަނައިގައި ލީޑުފުޅާކުރަން ލިބުނު ފުރުސަތު ލިވަޕޫލުން ނަގާލައިފި އެވެ.

މި ނަތީޖާއާ އެކު، ލިވަޕޫލް މި ވަގުތު ލީގުގެ އެއް ވަނާގައި އޮތީ ހަ ޕޮއިންޓުގެ ލީޑަކާ އެކު އެވެ. އެއީ، 19 މެޗުން 46 ޕޮއިންޓް ހޯދައިގެންނެވެ. ރޭގެ މެޗުން މޮޅުންވި ނަމަ 8 ޕޮއިންޓުގެ ލީޑެއް ލިވަޕޫލަން ލިބުނީހެވެ.

ލިވަޕޫލް ދަނޑުގައި ރޭ ކުޅުނު މި މެޗު ކުޅެވުމާ މެދު ގޮތެއް ނިންމަން ޖެހުނީ އިމަޖެންސީ ބައްދަލުވުންތަކެއް ބާއްވައިގެންނެވެ. އެއީ، މޫސުމާ ހެދި މެޗު ކެންސަލްކޮށްލަން ޖެހިދާނެތޯ ނޫނީ ކުރިއަށްދާނީތޯ ކަށަވަރުކުރަން ބޭއްވި އިމަޖެންސީ ސޭފްޓީ ބައްދަލުވުންތަކެކެވެ.

މެޗުގައި ލިވަޕޫލުން ލީޑުނެގީ މުހައްމަދު ސަލާހު ކާމިޔާބުކުރި ޕެނަލްޓީންނެވެ. މި ލަނޑާ އެކު، ސަލާހު ވަނީ ޕްރިމިއާ ލީގުގައި 175 ވަނަ ލަނޑު ޖަހައި، ތިއަރީ އޮންރީ ޖެހި އަދަދާ ހަމަކޮށްފަ އެވެ.

އެންމެ ފަހުން ލީގުގައި ކުޅުނު ތިން މެޗުން ބަލިވި ޔުނައިޓެޑުން މި މެޗުގައި ލީޑުނެގީ ދެ ވަނަ ހާފް ފެށިގެން ހަތް މިނިޓް ތެރޭ ލިސަންދްރޯ މާޓިނޭޒް ޖެހި ގޯލުންނެވެ. ލިވަޕޫލުން އެއްވަރުކުރީ ކޯޑީ ގަކްޕޯ ޖެހި ގޯލުންނެވެ. ޔުނައިޓެޑަށް އެއްވަރުކޮށްދިން ގޯލު ޖަހައިދިނީ ބަދަލަކަށް ކުޅެން އެރި އަލެހަންދްރޯ ގާނާޗޯ ދިން ބޯޅައަކުން އަމަދު ޑިއާލޯ އެވެ.

މި މެޗުން ލިބުނު ޕޮއިންޓާ އެކު، ޔުނައިޓެޑް ލީގުގެ 13 ވަނައިގައި އޮތީ 20 މެޗުން 23 ޕޮއިންޓާ އެކު އެވެ. އަދި ދެ ވަނައިގައި އޮތް އާސެނަލަށް 20 މެޗުން ވަނީ 40 ޕޮއިންޓް ލިބިފައެވެ. ތިން ވަނައިގައި އޮތް ނޮޓިންހަމް ފޮރެސްޓަށް ވަނީ 19 މެޗުން 37 ޕޮއިންޓް ލިބިފައެވެ.