ރައީސް މުއިއްޒަކީ އަވަސް ސުޕީޑުގައި މަސައްކަތް ކުރާ ވެރިއެއް: އަނާރާ

ރައީސް ޑރ. މުޙައްމަދު މުއިއްޒަކީ ރައްޔިތުންގެ އަޑުއަހާ, ރައްޔިތުންގެ މުހުތާދުތައް ދެނެގަނެގެން ވަރަށް އަވަސް ސްޕީޑުގައި މަސައްކަތް ކުރައްވާ ވެރިއެއްގެ ގޮތުގައި ފާހަގަ ކުރެވޭ ކަމަށް ހުރާ ދާއިރާގެ މެންބަރު ޑރ. އަނާރާ ނައީމް ވިދާޅުވެއްޖެ އެވެ.

އެކަމަނާ މިފަދައިން ވިދާޅުވީ، ރައީސް މުއިއްޒު ކ. ގުޅީ ރައްޔިތުންނާއި ބައްދަލުކުރެއްވުމަށް މިއަދު ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އަނާރާ ވިދާޅުވީ މި ވެރިކަމަށް މިވީ އަހަރެއްހާ ދުވަހުގެ ތެރޭގައި ފެނިގެންދިޔައީ، ރައްޔިތުންގެ އިހުސާސްތައް ދަނެގެން، ރައްޔިތުންގެ އަޑުއަހައި ރައްޔިތުންނާ ވަަރަށް ގާތުން މަސައްކުރާ މަންޒަރު ކަމަށެވެ.

އޭގެ އިތުރުން ރައްޔިތުންނާއި ގުޅުންހުރި ބޮޑެތި މައްސަލަތައް ހައްލުކުރުމަށް މި ސަރުކާރުން މުހިންމު ފިޔަވަޅުތަކެއް އަޅަމުން ގެންދާ ކަމަށް އަނާރާ ވިދާޅުވި އެވެ.

މެންބަރު އަނާރާ ވިދާޅުވީ މި ކުޑަ ދުވަސްކޮޅުގެ ތެރޭގައި ހުރާ ދާއިރާގެ ހުރިހާ ރަށްތަކަކަށް ވަޑައިގަތުން އެއީ އެ ރަށްރަށަށް ވެސް ލިބިގެންދިޔަ ވަރަށް ބޮޑު ޝަރަފެއް ކަމަށެވެ.

އަދުގެ ސަރުކާރުން ރައްޔިތުންގެ އުފާ ފާގަތި ކަމާއި ފުދުންތެރިކަމަށް ވަރަށް ބޮޑަށް ވިސްނާކަން އަނާރާ ފާހަގަ ކުރެއްވި އެވެ.

އެގޮތުން ވިދާޅުވީ މިއީ ރައްޔިތުންނަށް ފުދުންތެރި ދިރިއުޅުމެއް ހޯދައިދިނުމަށް ޓަކައި ބޮޑެތި މައްސަލަ ތަކަށް އަވަސް ހައްލު ހޯދައިދޭން ވެސް ވަރަށް ކެރޭ ފިވަޔަޅު އަޅައިގެން ކުރިއަށް ގެންދާ ސަރުކާރެއް ކަމަށެވެ.

"ހަގީގަތުގަ ސަރުކާރުން ނަގާ ކޮންމެ ޑިސިޝަނެއް ވެސް ނިންމަވާ ކޮންމެ ނިންމެވުމެއް ވެސް އެ ނިންމަވަނީ ރައްޔިތުންގެ ދުޅަހެޔޮ ކަމާއި ރައްޔިތުންގެ ފާގަތި ކަމާ ލާބަޔައަށް ކަން އެއީ ހަމަ އަޅުގަނޑަށް ގަބޫލު ކުރެވޭ އެކަންކަން އެގޮތަށް ކަން އެ ދަނީ،" އަނާރާ ވިދާޅުވި އެވެ.

ސަރުކާރަށް އެއްބާރުލުން ދިނުމުގައި ރައްޔިތުން ކުރިއަށް ދިޔުމަކީ މައްސަލަތައް ހައްލުވެ، އިތުރު ކުރިއެރުމާ ތަރައްގީ ރަށްރަށަށް ލިބޭނެ ކަމެއް ކަމުގެ ޔަގީންކަން އޮތް ކަމަށް ވެސް އަނާރާ ވިދާޅުވި އެވެ.